Containerit 40-t inigineqarsinnaasunngorlugit sanaat Tasiilamut tikipput. Inuit namminneq initaarnissaminnut sungiusarnerminni taakku atorsinnaassavaat, illoqarfimmilu inissaaleqinermut oqilisaataassapput.
Nammineq initaarnissamut sungiusarfiit
Containerit arfineq-pingasut Tasiilami inigineqarsinnaasunngorlugit piareersarneqaleruttorput. Taakku nammineq najugaqalernissamut sungiusarfittut atorneqassapput. Innuttaasut namminneq initaartigatik tapersersorneqarnissamik pisariaqartitsisut, sungiusaatigalugu containerini piffissami sivikitsumi ineqarsinnaassapput. Inigineqarsinnaasunut tunngatillugu kommunimi isumaginninnermik suliaqarnermik piginnaasalinnik attaveqaataasussanik sulisoqartitsissaaq, taakku innuttaasunut namminneq initaarnissaminnut sungiusartunut ikiortaasassapput.
”Innuttaasut namminneq initaarnissaannut tapersersuinerup aamma ulluinnarni akisussaassuseqarluni inuunissaannut ikiuunnerup iluaqutaanerata takunissaanut qilanaarpugut,” Kommuneqarfik Sermersuumi Isumaginninnermut Inunnullu Innarluutilinnut Ataatsimiititami siulittaasoq, Justus Hansen oqarpoq.
Containerimi ataatsimi innuttaasoq ataaseq inissaqarpoq – imaluunniit aappariit. Containerit arfineq-pingasut uani qaammammi novembarimi imaluunniit decembarimi iserterfigineqarsinnaaanngornissaat naatsorsuutaavoq.
Tasiilami angerlarsimaffiusinnaasut
Containerini 40-suni 32-t ilaatigut inuusuttunut inissiatut atorneqassapput. Taakku Nuummiit Tasiilamut nassiunneqartut tamarmik tikissimalerput, inissisimaffissaannillu tulluartumik aalajangiinissaq utaqqineqarluni. Containerit nutaanik inissialiortoqarnissaata tungaanut atorneqassapput.
”Containerinik inigineqarsinnaasunik peqalernikkut innuttaasut inissaqanngitsut ikiulertornissaannut periarfissaqalerpugut. Aaqqiissutaaginnarallarpoq, illoqarfimmili kikkut tamarmik angerlarsimaffeqarnissaannut pingaaruteqarluni,” Hjørdis Viberg, Tasiilami Bychefi oqarpoq.
