Ukiut tamaasa Kommunimit ingerlanneqartartoq Timersortartut Ulluat januaarip 6-iani ingerlanneqartartoq qanilliartorpoq.
Tassunga atatillugu pisarnertut 2025-mi pissartanngorsimasut nersorneqassapput, taamaattumik timersoqatigiiffiit piumaffigerusuppagut: Nunatsinni, Danmarkimi, Nunani avannarlerni, Europami imaluunniit Nunarsuarmi pissartanngortitaqarsimagunik aqqi, timersoqatigiiffik ilaasortaaffigisaa, timersuut aallutaq, pissartanngorfigisimasaq imaluunniit paasissutissat pingaaruteqarsinnaasut uatsinnut nassiuteqqullugit.
Qulaani piumasarineqartut Sammisassaqartitsinermut Kulturimullu Immikkoortoqarfianut nassiunneqassapput. Tassungalu atatillugu inussiarnersumik piumaffigerusuppatsigit ukioq 2025-mut atatillugu timersoqatigiiffissi iluanni malunnaateqarluarsimasumik/-nik tunngavilersuuteqarluartunik innersuussuteqaqqullusi ukuninnga:
- Ukiup timersullammaa
- Ukiup iligiivi
- Kajumissaat
- Aqutsisuullammak
- Piukkunnaatilik
- Sungiusaallammak
Kingusinnerpaamik Sammisassaqartitsinermut Kulturimullu Immikkoortortaqarfimmut tunniunneqareersimassapput 17. oktobari 2025, imaluunniit uunga nassiullugit peqatigiiffiit@sermersooq.gl