Aninagasaqarnermut Inuussutissarsiornermullu Ataatsimiititap oktobarip 7-ianni 2025 aalajangerpaa, kommunimut pilersaarummut tapiliussatut siunnersuut 30C2-2 tamanut tusarniaassutigineqassasoq.
Siunertaa
Pilersaarusiornermut periusissiaq 2023-mi kommunimi innuttaasut katitigaanerisa nikeriarnerat malillugu inissianik pisariaqartitsineq naammassiniarlugu ukkataqarfiuvoq. Napparsimmavimmut B-81-mut uiggiullugu nutaamik utoqqaat illuliorneq, pilersaarummut toqqammavimmi matumani periarfissaalissaaq.
Aamma pilersaarummut toqqammavimmi inissiat uiguleriiaat B-1000 aammalu ilaqutariinnik sullissiviup B-155 isaternissaat periarfissaalissaaq sanaartorfissat iluanni nutaani, ullutsinnut naleqquttunik atuuffeqalernissaa periarfissinniarlugu. Taamatuttaaq B-1600 – Pilersuisoq aamma B-80 allineqarnissaa periarfissaalissaaq erngup nukinganik nukissiorfiup immikkoortup ilaani 30E13-mi inissisimasup allineqarnissaanut atatillugu.
Tasiilami immikkoortuni sanaartukkat eqiteriffiusut avataanni qimmit katersuutikkumallugit, immikkuualuttumi pineqartumi qimmeqarfinnik pilersitsinissaq maannangaaq periarfissaajunnaarpoq.
Pilersaarummi siunertat tunngaviillu:
- Utoqqaat illussaannut sanaartorfissamik immikkoortitsineq napparsimmavimmut uiggiullugu. Taamatut inissiinikkut suliffeqarfiit taakkua marluk ataatsimut sanaartorneqarsinnaapput ininillu avitseqatigiillutik.
- Illut uiguleriiaat B-1000 aamma ilaqutariinnik sullissiviup B-155 isaternissaanut periarfissiinissaq nutaanik ullutsinnut naleqquttunik sullissivimmi atortoqalernissaa periarfissinniarlugu.
- Pisiniarfiup B-1600 kiisalu B-80 allinissaanut sanaartorfissanik immikkoortitsineq erngup nukinganik nukissiorfiup allinissaanut atatillugu koblings- / transformerstationip allinissaanut inissaqartitsiumalluni.
Tamanut oqallisissiaq
Pilersaarutitut siunnersuut piffissami 15. oktobarip – 26. novembarip 2025-ip tungaanut tamanut tusarniutigineqassaaq.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
Oqaaseqaatit kingusinnerpaamik 26. novembarip 2025 uunga nassiunneqassapput: plan@sermersooq.gl
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
Pilersaarut uani atuarneqarsinnaavoq: