Kommuneqarfik Sermersooq KNR-imut saaffiginnissuteqarpoq, tusagassiiviup sapaatip-akunnerata siuliani Atuarfiup Samuel Kleinschmidtip (ASK-ip), oqoqarnera pillugu tallimanngornermi matoqqanissaanik nutaarsiassamik saqqummiussineranut atasumik. Eqqunngitsumik paasissutissiineruvoq.
Kommunimit erseqqissaatigineqarpoq, ASK-ip matoqqanissaa pillugu aalajangiisoqanngitsoq, aamma atuarfiup iluani silaannaap pitsaassusia pillugu teknikkikkut misissuinerit inernerisa tiguneqarnissaat suli utaqqineqartoq Misissuinernit inernerit oktobarip 15-iani piareersimassasut naatsorsuutigineqarpoq, taakkua aalajangiinernut tulliuttunut tunngavissatut atorneqassapput.
Nutaarsiassamut tunngatillugu KNR pisumut atatillugu attaveqaqatigiinnermut immikkoortortami sulisumut apeqqutinik arlalinnik nassiussivoq. Apeqqutit nassiunneqartut ASK-ip matunissaanut uppernarsaanissamut naqqiuteqarnissamulluunniit tunngassuteqanngillat aamma apeqqut ataasiinnaq borgmesterimut Avaaraq Olsenimut tunngavoq.
KNR-imiit apeqqutit saaffiginnissutigineqartut saqqummiunneqannginnerini minutsit 40-ruunnaat sioqqullugit tiguai, atuarfimmullu tunngatillugu nutaarsiassami saqqummiunneqarput. Nutaarsiassamilu apeqqutit borgmesterimut tunngatinniarneqarput.
Periuserineqartoq kommunimit naapertuutinngitsutut isigineqarpoq, saaffiginnissut pissutsinik ilungersunartunik katitigaasunik imaqarmat – taakkua tassaapput sanaartornermi teknikkimut tunngasut, peqqissutsimik naliliinerit aamma politikkikkut akisussaanermut tunngasut.
– Tusagassiinermik suliaqarneq ataqqeqqissaarparput, aamma sapaatip-akunneri tamaasa tusagassiivinnit saaffiginnissuterpassuit akisarpavut. Kisianni akissutinik eqqortunik aamma pitsaassusilinnik tunniussinissatsinnut naapertuuttumik piffissaqartinneqartariaqarpugut. Pissutsit piviusut suli qulaarneqarsimatinnagit oqaluttuanik saqqummiussisoqartillugu angajoqqaat, atuartut aamma sulisut akornanni eqqissisimannginnermik pisariaqanngitsumik pilersitsisoqartarpoq, Attaveqaqatigiinnermut Sulisunillu ineriartortitsinermut pisortaq Rosannguaq Rossen oqarpoq.
Taassuma erseqqissarpaa KNR-imit apeqqutit – ilaatigut meeqqat sumi atuartinneqarnissaannut tunngasut aamma borgmesteri suli borgmesteritut issiavimmi issiasussatut eqqortuunersoq pillugu apeqqutit – pissutsit killiffiannut ataatsimilluunniit sammisuunnginnerat
– Apeqqutit erseqqissumik tunngavissalimmillu akisimasinnaavagut periarfissinneqarsimasuugutta. Apeqqutit saqqummiunneqartut ataatsimilluunniit akinaveersaanngilagut – kisianni eqqortunik kukkusuunngitsunik akissuteqarsinnaarusuppugut, Rosannguaq Rossen oqarpoq.
Borgmesteri Avaaraq Olsen oqarpoq:
– Atuarfiit pillugit nalorninartunik pisoqartillugu angajoqqaat aamma innuttaasut ernumassuteqarnerat paasinaqqissaarpoq. Taamaattumik aamma pingaaruteqartorujussuuvoq tusagassiivinni paasissutissat eqqortuunissaat aamma paasissutissanik pissarsiffinnit uppernassuseqartunit tunngaveqarnissaat. Tusagassiivinnut tamatigut ammasuuvugut saaffigineqartuarnissatsinnullu piareersimalluta, kisianni tamanna ileqqorissaarnermik tunngaveqassaaq. Aalajangersimasumik oqaatigerusuppara, ASK-i matunngilaq aamma aalajangiisoqartinnagu misissuinerit inernerat utaqqeqqaassavagut.
Kommunimit ilisimatitsissutigineqarpoq, angajoqqaat ASK-mi atuartuutillit ForældreIntra aqqutigalugu ingerlaavartumik ilisimatinneqartartut, aamma atuartitsineq pilersaarutit malillugit ingerlasoq, allanik aalajangiisoqaratarsinnaanerata tungaanut.
– Pingaarnerpaaq tassaavoq meeqqat toqqissisimallutik atuariartorsinnaanerat, aamma angajoqqaat uagutsinnit – tusatsiakkatiguunngitsoq – erseqqissunik nalunaarfigineqartarnissaat. Tusagassiiviit qanimut anguniagaqarlutalu suleqatiginissaat kissaatigaarput, innuttaasut paasissutissat pissarsiatik qaqugukkulluunniit tatigisinnaaniassammassuk, borgmesteri oqarpoq.