Aaqqissoqqinneqarpoq 02.10.2025: Allaatigisaq una tamanut saqqummiussereernerup kingorna nutarterneqarpoq kukkunerit iluarsiiviginiarlugit.
Tasiilami umiarsualivik itinerulissaaq. Tasiilami qitiusumik umiarsualiviup naqqanit sioraajaasoqarpoq. Umiatsiat umiarsualiviup iluatungaani puttasunut pitussimasut killeqanngitsumik tikissinnaanngornissaannut aallarsinnaanngornissaannullu alloriarneq siulliuvoq.
Tasiilami qitiusumik umiarsualivimmi imaq ikkappallaarpoq. Ullormut 5 tiimit missaat umiatsiat inuinnarnit pigineqartut umiarsualiviup iluatungaani puttasuni pitussimasut aallarsinnaaneq ajorput tikissinnaanatillu. Tassunga ilanngullugu umiarsualiviup naqqani orsertarfeqarpoq, tamannalu ilaatigooriarluni umiatsiat naqqinik sarpiinillu kiliortitsisarpoq.
Siorartaat sapaatip-akunneri marluk matuma siorna Tasiilamut tikippoq. Immap naqqani annertuunik eqqagassaqarnera ajornartorsiutigaa. Immap naqqaniit katersorneqaqqaartariaqarput. Piffissaliussaasumik annertuumik atuiffiuvoq. Tulliattut sioraajaasoqarpoq. Umiarsuaq atorlugu atortorissaarut umiarsualivimmi 4 meterit angullugit angallatinut aqqutissiorluni sioraajaavoq, massakkullu ukioq manna angumerineqarsinnaasut naammassineqarput.
Immap naqqanit sioqqat ima pitsaatigaat ukiup tulliani kommunip sanaartornerani atorneqarsinnaallutik. Ima pitsaatigisimapput, Royal Greenlandimut tunisaqarsimapput kiisalu inissianik illoqarfimmi Iserimmit pilersinneqartussanut arlalinnut atorneqartussanngorlugit nassiunneqarput.
