Paamiuni innuttaasut amerlasuut takkupput, Kommuneqarfik Sermersuup Paamiut ineriartornissaanut periusissiornissamut sulinissamut aallartilluni innuttaasunik ataatsimiisitsimmat.
Kommuneqarfik Sermersuumi Pisortaqatigiit allatseqarfiat borgmesterimik Avaaraq Olsenimik aammalu kommunalbestyrelsemi ilaasortamik Dorthe-Marie Mogensen-Fontainimik peqateqarlutik Paamiuni sapaatip akunnerata siuliani ataatsimiisitsipput.
Periusissiornissamut sulineq aatsaat aallartippoq. Aallaqqaataaniillu innuttaasunik peqataatitsilluinnarnissaq pingaartinneqarpoq. Periusissiaq siunissamut ungasinnerusumut illoqarfiup ineriartorfigisinnaasaanik ersarissunik imaqassaaq.
”Illoqarfik sutigut tamatigut inerisarneqassappat najukkami innuttaasut peqatigineqaffaarittariaqarput. Qanorsuaq politikkikkut aalajangersaasinnaavugut, innuttaasulli piginneqataatillugit peqataatinngikkutsigit anguniakkat pappiaqqamiiginnassapput, taamaammat assorsuaq nuannaarpunga innuttaasut taamak amerlatigisut ornigummata,” borgmesteri Avaaraq Olsen oqarpoq.
Paamiuni innuttaasunik ataatsimiisitsinermi innuttaasut amerlasuut katersortarfimmut Taqqissuummut peqataajartorput. Ukioqatigiiaat tamarmik peqataatitaqarlutik. Periusissiornermi Paamiormiut tamarmik peqataatinneqarnissaat pingaaruteqarpoq. Innuttaasunik ataatsimiisitsinnginnermi meeqqat atuarfianni atuartut aammalu illoqarfimmi inuussutissarsiortut siunnersuisoqatigiivi naapinneqarlutik.
Periusissiornissap aallartinneqarnerani innuttaasut takorluugaat killilersorneqaratik ingerlanneqarput. Periusissiornermi sulisut ingerlatsisut innuttaasut kissaataat, takorluugaat piumasaallu tamaviisa allattorneqarnissaat pingaartippaat. Naluttarfiit, filmertarfiit, Paamiuni innuttaasut 3000-it allarpassuillu taakkartorneqarput.
Innuttaasunik ataatsimiisitsinermi peqataasunut ilaavoq Aputsiaq Inuk Petersen.
“Paamiut siunissaa pillugu innuttaasut peqataatinneqarnerat inissaminiippoq aamma eqqartorneqartut takorluukkat siammasipput. Taamatut periarfissinneqarnerput nuannerpoq takorluukkallu anguniarneqarnissaat neriulluarnarput,” Aputsiaq Inuk Petersen oqarpoq.
Periusissiorneq qaammatini tulliuttuni ingerlaqqissaaq, Paamiut ineriartornissaanut periusissiaq naammassineqarluni allanneqannginnerani innuttaasut immersueqataanissaannut periarfissinneqaqqikkumaarput.