Siullermeertumik Tasiilami najukkami siunnersortit ikiortaattut ilinniagaq tamakkiisut ingerlanneqarsinnaalerpoq. Aallartitsinissamik sukumiisumik isumaqatigiittoqarpoq holdillu ataatsit oktobarimi aallartissapput. Tamanna isumaqarpoq, illoqarfimmi innuttaasut massakkut ilaquttatik aamma illoqarfitsik qimannagit ilinniagaqarsinnaalersut.
Ilinniagaq PI/SPS-imit (Perorsaasunngorniat Ilinniarfiat) neqeroorutigineqarpoq, maannamullu Nuummi Ilulissanilu ingerlanneqarsinnaasimalluni. Massakkullu Tasiilami najukkami holdit 20-t missaannik peqataaffigineqartut oktobarimi aallartinnissaannut pilersitsineq iluatsippoq.
“Siunnersortit ikiortaattut ilinniakkap massakkut illoqarfitsinni neqeroorutigineqarsinnaalernera nuannaarutigeqaarput. Inuusuttut inersimasullu – Tasiilaq qimanngikkaluarlugu ilinniagaqarnissaminnut periarfissaqarlualerput. Tamanna najukkami inuiaqatigiinni ataasiakkaanut tamarmullu nukittorsaassaaq, Hjørdis Viberg, Tasiilami Bychefi oqarpoq”
Ilinnialersussani siullerni kajumissuseq aamma ersareqaaq. Amerlasuut ingammik ilaquttat illoqarfigisarlu qimanngikkaluarlugu suliatigut ineriartornissamut periarfissaqalerneq erseqqissaatigaat.
“Nunarput aamma illoqarfipput qimanngikkaluarlugu ilinniakkamik ineriartornissamut periarfissalimmik aallartitsisinnaaneq uannut periarfissaavoq annertooq nalitoorlu. Suliareriikkakka pillugit ilisimasaqarnerulernissara qilanaarilereerpara. Naak meeqqanut ilaqutariinnullu ikorfartuutaasunik arlalinnik suliniuteqareeraluarluta aamma sakkussaqaraluarluta, ilinniakkap sulininni sakkussanik sukumiinerusunik amerlanernik tunissavaanga. Sulinera ilinniarnermik ataqatigiisissinnaanissaanut – aamma sulinikkut inuttullu pissarsiaqarluarnissara qilanaaraara,” Jakobine Uitsatikitseq, ilinniartunngortussaq oqarpoq.
Massakkut holdit ataatsit pineqarmata erseqqissassallugu pingaaruteqarpoq – aamma ilinniagaq Tasiilami uteqqiattumik nalunaarutigineqarsinnaanissaa suli nalunarpoq.
Taamaattoq kommunimit iliuuseqarneq nutaaq taanna alloriarnertut pingaarutilittut isigineqarpoq neriuutigineqarlunilu innuttaasut amerlanerusut ilinniaqqinnissamut alloriassasut – aamma naak piffissami matumani ataasiaannartumik ingerlasoqartussaagaluartoq.