SUSNOW aamma Siu-Tsiu

Asasara kommunalbestyrelsimut ilaasortaq, Egon Poulsen (S)

Siullermik apeqqutigisannut qujanarujussuaq.

Ulloq 04. septembari 2025 “SUSNOW aamma Siu-Tsiu” pillugit allaffeqarfitsinnut apeqquteqaatinik nassiussivutit.

Pisortaqatigiit Allatseqarfianit apeqqutitit tiguagut, imaattut:

“Matumuuna qulaani qulequttami pineqartut Projekt-it marluk SUSNOW aamma Siu-Tsiu Kommuneqarfik Sermersooq-mut qanoq isumaqatigiissuteqarnersut suullu suliassarineraat taavalu kommune qanoq akiliisarnersoq isumaqatigiissutip imarisaanik takunnikkumallunga saaffiginnissuteqarpunga ajornanngippat isumaqatigiissutip imarisai tamarmik.”

Qujanaq saaffiginnissutinnut Kommuneqarfik Sermersooq aamma SUSNOW (Sustainable Now) akornanni isumaqatigiissummut tunngassuteqartunut.

Kommuneqarfik Sermersuup aamma peqatigiiffiup Sustainable Now akornanni suleqatigiinnissamut isumaqatigiissusiortoqarnikuuvoq. Isumaqatigiissut kommunaldirektøriusimasup aamma Meeqqanut Ilaqutariinnullu Ingerlatsivimmi pisortaasimasup akornanni atsioqatigiissutigineqarpoq.

Kommuneqarfik Sermersooq ukiumoortumik aningaasatigut tapiissutinik 1,5 mio. kr.-inik momsitaqanngitsunik Sustainable Now-imut tunniussisarpoq. Aningaasat ilaatigut siunnersortit sulinerannut, ineriartortitsinermi aningaasartuutinut, angalanermut ineqarnermullu, allaffissornermut aammalu Danmarkimi Nunatsinnilu aningaasartuutinut allanut matussutaasussaapput. Aningaasat ukiumut marloriarluni akilerneqartarput. Meeqqanut Ilaqutariinnullu Ingerlatsivik tassaavoq suleqatigiinnermut akiliuteqartuusoq.

Anguniagaq aamma siunertaq

Suliniut Tasiilami Suleqatigiippugut (”Sammen i Tasiilaq”) 2020-miit 2027-mut ingerlanneqartoq ingerlatissallugu ineriartortissallugulu isumaqatigiissuteqarnikkut siunertaavoq. Suliniutikkut siunertarineqarpoq:

• Tasiilami eqqaanilu meeqqanut inuusuttunullu peroriartornermi periarfissanik pitsaanerusunik pilersitsinissaq.
• Najukkani inuit nukissallit aamma attaveqaatit suliniutinik ingerlasunik ingerlatsereersuusut tapersersorneqarnissaat ineriartortinnissaallu.
• Innuttaasunik peqataatitsinermik, piujuartitsinermik aamma nukissaqassusissamik suliaqarneq.
• Najukkami piginnaasat pigineqartut tapersersornissaat suliniutinik aqutsineq, ilinniagaqarneq aamma suleqatigiinneq aqqutigalugit.
• FN-ip nunarsuarmiunut anguniagai aamma kommunip piujuartitsinermik siunertaqarluni ineriartornissamik anguniakkatut pilersaarutaanut tapertaaneq.

Suliniutitut sammisat imaraat malittarinnittoqatigiinnik pilersitsineq, ukiumoortumik Tasiilamut suliartorluni tikeraarneq, suliniutinik aqutsinermut atuartitsineq aamma oqaluttuartitsinermik periutsit, siunnersortit, pilersaarusiorneq, aningaasaqarnermik aqutsineq kiisalu ukiumoortumik nalunaarutit aamma naliliinerit.

Isumaqatigiissut tamakkiisoq ilanngunneqarpoq.

Inuulluaqqusillunga

Christina Rasmussen

Allatseqarfimmi pisortaq, Pisortaqatigiit Allatseqarfiat

–

Siullertut pingaarnertullu ingerlatsiviup tungaaniit Siu-Tsiumik suliniummut apeqqutitit qujassutigissavakka aamma tassunga atasumik Kommuneqarfik Sermersuup suliassatut isumaqatigiissutai kiisalu aningaasaqarnikkut sinaakkutissanut tunngasut.

Kommuneqarfik Sermersooq siullermeerluni Siu-Tsiumik ingerlatsinissamut isumaqatigiissummik pilersitsissalluni aalajangerpoq ulloq aggustip 31.-at 2021 Kommunalbestyrelsip ataatsimiinnerani, Aningaasaqarnermut Inuussutissarsiornermullu Ataatsimiititap kiisalu Isumaginninnermut Suliffissaqartitsinermullu Ataatsimiititap innersuussinerata kingorna. Ingerlatsinermik isumaqatigiissut 2023-mi nutarterneqarpoq, taamaaliornikkut neqeroorummi siunissami atuartut 15-it pallillugit atuartuutigineqarsinnaaqqullugit siusinnerusukkut 10-usartut. Ingerlatsinermik isumaqatigiissut 2024-mi piffissamut 2024-26 sivitsorneqarpoq, aamma maajimi 2026 atorunnaassaaq.

Siu-Tsiup suliassai Kommuneqarfik Sermersuumik isumaqatigiissummik atuutsitsineq naapertorlugu tassaapput, ulluunerani neqeroorummik sannavimmi aamma inuussutissarsiuummik atuartitsinernik imalimmik, kiisalu pisortat namminersortullu suliffeqarfiutaanni suliffimmik sungiusarnermik imalimmik ingerlatsissalluni. Siu-Tsiumit sullinniarneqartut tassaapput inuusuttut 16-inik ukioqalereersimasut, atuagarsornermik kajumissuseqanngitsut aamma/imaluunniit piginnaaneqanngitsut. Ingerlatsinerit nalaanni inuusuttut suliffinnut imaluunniit ilinniakkanut naleqqussuseqarnerat misilerartuarneqartarpoq.

Siu-Tsiumi inissanut 15-it pallillugit amerlassuseqartunut Kommune qaammammut inuusuttumut ataatsimut 8.000 kr.-inik akiliuteqartarpoq. Kommuneqarfik Sermersooq neqeroorummut innersuussisuuvoq aamma inissanut 15-inut akiliuteqartarpoq, inissat kommunip atugai qanorluunniit amerlatigigaluarpata.

Taamaattumik Kommuneqarfik Sermersuup aningaasartuutai katillugit ukiumut 1.440.000 kr.-iupput, taakkua Siu-Tsiu-mik ingerlatsinermut tapiissutitut tunniunneqartarput.

Namminersorlutik Oqartussat Tasiilami atuagarsortuunngitsunut ingerlatsinernut tapiissutinik tunniussineq ajorput.

Ilanngullugu atuartunut tapiissutit Kommunimit akilerneqartarput. Pisartakkatut tunniunneqartartut taakkua Namminersorlutik Oqartussanit 100 %-mik utertinneqartarput, aamma qulaani aningaasat taaneqartuni ilanngunneqarneq ajorput.

Ilanngunneqarpoq isumaqatigiissut kingulleq 2024-meersoq

Inuulluaqqusillunga

Ejner Grønvold

Pisortaq, Suliffeqarnermut Isumaginninnermullu Ingerlatsivik