Kapisilinni ammerivimmi AmmiAmiimi sulisut puisit amiinik aatsaat taama tunisisoqartigimmat nuannattunnguupput. Piffisap sivikitsup iluani tunisat pingasoriaammik amerleriarput, ammillu 27-t sapaatip-akunnerata ingerlanerani pisiarineqarput – tamanna nunaqarfimmi piniartunik qaninnerusumik suleqateqarnikkut anguneqarpoq.
AmmiAmii Kittat ataani immikkoortortaqarfiulluni Kommuneqarfik Sermersuumit ingerlanneqarpoq – sulisullu marluk kalaallisuunut atugassanik ammerisarput. Ammerivimmi amissaqarniarneq siornatigut unammillernarsimavoq, aasalli ingerlanerani AmmiAmii aamma Kittat suleqatigiilluarnermikkut tunisat pitsanngortippaat.
Nuummi Qeqertarsuatsiaanilu mersortarfinni suliassanut amissaqarnissaq qulakkeerniarneqarpoq aamma puisit amii suliareriikkat piumaneqaleraluttuinnartut, Kittat aqqutigalugu sinerissamut tunisisinnaanissaq siunertaavoq.
Facebookimi tuniniaaneq – ullup ataatsip ingerlanerani nunguttut
Kittani ammit suliareriikkat 14-t misiligutigalugu Kittat Facebookiatigut saqqummiunneqarput. Saqqummiussat Kittat Nuummi pisiniarfiani tuniniarneqarput, sinerissamiillu piserusuttut mailerlutik sianerlutillu inniminniinissaminnut periarfissinneqarput. Soqutiginnittoqaqaarlu – ammimmi 14-it alersiliassatuunerusoq atorneqarsinnaasut ullormi tassani tamarmik tunineqarput.
”Piumaneqaqisut paasivarput – taamaammat piniartut, ammerisartut aamma pisisartut toqqaannartumik suleqatigiinnerat pilersissinnaavarput,” AmmiAmiimi sulisoq oqaluttuarpoq.
Piniartut tunisisut – aamma weekendini
Puisit amiisa piumaneqarnerujussuannut angummassinnaajumalluni, AmmiAmii piniartunut attaveqartarnermik pitsanngorsaavoq. Piniartut ammerivimmut maanna tunisisinnaanngorput, aamma weekendini, tuniniaanermullu iluaqutangaatsiarpoq.
Ammit tunisat alersiliassatut aamma kamisaliassatut, seeqqerngiassatut aamma ammit qalipatat avittanut atugassatut suliarineqarput. Taamaaliornikkut kalaallit assuutaannut tunngatillugu kulturikkut kingornussat tigussaasut tigussaanngitsullu eqqarsaatigalugit, AmmiAmii pingaarutilittut inissisimalerpoq.
Inissaalatsineq aporfeqartitsisoq
Maanna siuariartorneq neriunaateqaraluartoq, ammerivik allamik unammillernatitaqalerpoq: toqqorsivissaaleqineq.
”Siunissaq qilanaaraarput aamma amminik suliareriikkanik piserusunnerulernermi suli amerlanerusut kalaallisooqalersinnaanerat neriuutigaarput. Kapisilinnili sullivitsinni periarfissat pitsaanerusut pisariaqartippagut, taamaanngippat amminik amerlanerusunik suliaqarsinnaanngilagut,” ammerisartoq Aka oqarpoq.
Kapisilinni rekortiliinerup takutippaa piumassuseqartoqartoq periarfissagissaartorlu – aamma piniartut, ammerisartut kiisalu mersortarfiit suleqatigiinnerat ileqqut kinguaariinnut tulliuttunut ingerlaqqinnissaannut qulakkeerisuusinnaavoq.
