Nuummi umiarsualivimmik atuisut Nuuk Maritime Netværkimi sapaatip-akunnerata siuliani naapipput, pisariaqartitatillu pillugit tusarnaarlutillu ukiut 20-t tulliuttut susoqassaneranik eqqartuipput.
Nuummi umiarsualivik atuisoqaleraluttuinnarpoq. Kilisaatit usingiarneqassatillutik talittarfimmi inissaqarniartarnerat ajornartarpoq, umiarsualivillu ulikkaaqqagaangat umiarsuit takornariartaatit tulassinnaatitaasaratik. Umiarsualivimmik atuisut assigiinngitsut tulassinnaajumallutik siulliuniuttarput. Taakkunannga aallartitat sapaatip-akunnerata siuliani soqutigineqaqisumik naapillutik oqalliseqatigiipput: Nuuk Maritime Netværk.
Nuuk Maritime Netværk aqqutigalugu Nuup eqqaani imarsiornermut tunngatillugu susassaqartut naapinnissaminnut periarfissaqarput, immikkut sunik pisariaqartitaqarnerminnik tusarnaarlutik aamma ataatsimoorlutik sunniuteqarsinnaallutik. Taamatut naapittarfeqarneq kommunimit ingerlanneqarpoq, ilaasortallu 50-it sinnillit Nuummi umiarsualivimmut attuumassuteqarput.
Nuummi umiarsualiviup ukiuni 20-ni tulliuttuni qanoq ineriartortinneqarnissaa pillugu Nuuk Maritime Netværkimi siulersuisut takorluukkaminnik sapaatit-akunnerata siuliani aaqqissuussinermi saqqummiussipput. Peqataasut 43-sut tassaapput aalisakkerinermik suliffeqarfiit, takornariartitsisartut, Issittumi Sakkutooqarfik aamma imarsiortunik sullissisut, taakkulu maanna aamma siunissami pisariaqartitaminnik anngussaqarput. Suliniutit oqaluuserineqartut ilagaat illoqarfiup uuliaasivissaata siunissami inissisimaffissaa, umiatsianut taleqqasarfiit amerlanerusut, Qeqertani alliliinissaq aamma tassani imarsiortunik sullissisut inissaqalernissaat.
Nuuk Maritime Netværkip aalisartut piniartullu peqatigiifii NAPP aamma Neqitaq uani sapaatip-akunnerani ataatsimeeqatigissavai. Anguniarneqartullu aamma peqataasunit siunnersuutit kommunalbestyrelsemut sapaatip-akunnerani aggersumi saqqummiunneqassapput.
