Aninagasaqarnermut Inuussutissarsiornermullu Ataatsimiititap aggustip 22-ianni 2025 aalajangerpaa, kommunimut pilersaarummut tapiliussatut siunnersuut 4C8-1 tamanut tusarniaassutigineqassasoq.
Siunertaa
Kommuneqarfik Sermersuumi Pilersaarusiornermut Periusissiaq aamma Illoqarfiit pingaarnersaat pillugu Periusissiaq malillugit Nuuk nunanit tamalaanit takornariarfissatut annertusisamik ineriartortinneqassaaq. Illoqarfiit pingaarnersaat pillugu Periusissiami allassimavoq:
“FN-imi Nunarsuaq tamakkerlugu takornarialerinermik suliniaqatigiiffik (UNWYO) naapertorlugu 2014-imi nunarsuaq tamakkerlugu takornariat 1,1 milliardiupput. Takornariaqarnerup aaqqissuussamillu takornariat amerliartornissaat naatsorsuutigineqarpoq, tamatumani nunarput nukittunersaalluni ineriartortitsivigineqarnerpaanissaa naatsorsuutigineqarpoq. Takornarianut tuniniaaviit naatsumik oqaatigalugu annertoorujussuupput sulilu annertusiartussallutik.”
Pilersaarusiornermut Periusissaq 2023-meersoq malillugu kommuneqarfimmi akunnittarfimmi init amerlassusaat 2030 nallertinnagu 50%-inik amerlineqassapput. Taakkunani akunnittarfinni init nutaat 25%-ii piujuartitsinissamut uppernarsaatissaqassapput. Illoqarfiup ilaanut pilersaarut una Nuummi akunnittarfinnik sanaartornissamik pilersaarusiornermut periusissiami anguniarneqartoq piviusunngortinneqarnissaanut suliarineqarpoq.
Akunnittarfiit nutaat inissinneqarnissaannut 2023-mi annertusisamik peqataatitsinermik suliaqarneq tunngavigalugu, inissiiffissat tulliuttut saqqummiunneqarput.
Pilersaarummi siunertat tunngaviillu:
- Akunnittarfiit tigusisinnaanerannik annertunerulersitsineq – qitiusoqarfiup Nuup avataanut – pilersaarusiornermut periusissiami anguniagarineqartutut illoqarfiit pingaarnersaanni takornariaqarnermik ineriartortitsinissamut atatillugu.
- Qinngutsinni qitiusoqarfik Pisissiani 4C1 Qitiusoqarfimmut uiggiullugu tunngavilerneqassasoq aamma Qinngutsinni najugaqartunut takornarianullu ornigarneqarsinnaasut nutaat qulakkeerneqarnissaat.
- Immikkoortup ilaani sanaartornermi Kuussuannguup eqqaani sukisaarsaarfiusinnaasut aamma immikkoortup ilaani pisuffittut aqqutit eqqarsaatigineqartassasut.
Tamanut oqallisissiaq
Pilersaarutitut siunnersuut piffissami 10. septembarip – 5. novembarip 2025-ip tungaanut tamanut tusarniutigineqassaaq.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
Oqaaseqaatit kingusinnerpaamik 5. novembari 2025 uunga nassiunneqassapput: plan@sermersooq.gl
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
Pilersaarut uani atuarneqarsinnaavoq
Kommunimut pilersaarummut tapiliussamut siunnersuut kommunip nittartagaani www.sermersooq.gl-imi tusarniaassut ataani atuarneqarsinnaavoq, kommunip innuttaasunik kiffartuussiviini imaluunniit Sanarfinermut Avatangiisinullu ingerlatsivimmut 36 74 00-imut saaffiginninnikkut pissarsiarineqarsinnaavoq.