Yellow Septemberimut atatillugu Nuummi Kommuneqarfiup allaffia sapaat aallarnerfigalugu ataasinngornerup ullaavata tungaanut sungaartunik qullilersorsimassaaq. Peqatigitillugulu septembari qaammat naallugu Sipisaq Kangillermi Aziz Lightit sungaartumik ikumatinneqassapput. Innuttaasunik Kiffartuussivimmi sløjfe-mik sungaartumik aallersinnaavutit, taanna tapersersuinermut pitsaaliuinermullu assersuutaavoq – aamma allaffeqarfik naasunik sungaartunik pinnersarneqassaaq.
Yellow September Nunarsuaq tamakkerlugu malunnartitsiniarneruvoq, imminut toquttarneq eqqarsaatigalugu eqqumaffiginninnissaq, ammasuunissaq pitsaaliuinissarlu qitiutinneqarlutik. Imminut toquttarnermik pitsaaliuinermi Kommuneqarfik Sermersooq toqqaannartumik toqqaannanngitsumillu siammasissumik suliaqartarput.
Peqqinneq ingerlalluarnerlu aqqutigalugit pitsaaliuineq
Ineriartornermut, Peqqinnermik Siuarsaaneq Pitsaaliuinermullu immikkoortortami meeqqanut inuusuttunullu anguniagalimmik patajaatsunik killiliussaliornikkut toqqaannanngikkaluamik imminut toqunnissamik pitsaaliuineruvoq.
- Sulisut meeqqanik qanimut sullissinermik suliallit piginnaasatigut qaffassaaneq, taamaalillutik isummakkut peqqissuutitsiniarnermi ingerlalluartitsiniarnermilu sakkussaqarniassammata.
- Pimmatiginnittarnermut pitsaaliuinermut, isummakkut peqqissuunermut, kinguaassiutitigut peqqissuunermut aanngajaarniutinullu tunngasunik sulisunut angajoqqaanullu saqqummiisarnerit workshoppertitsisarnerillu ingerlanneqartarput.
- Suliniummut peqatigitillugu atuartut aanngajaarniutinik pinaveersaartitsineq pillugu atuartinneqartarput.
Imminut toquttarneq pillugu toqqaannartumik pitsaaliuineq
Kommunimi imminut toqunnissamut pitsaaliuinermik ilitsersuisartut kommunimi sulisunut pikkorissaasarput – aamma innuttaasut tunngaviatigut aallaavigalugit – Nunatsinni imminut toquttarneq, attaveqaqatigiittarnermi sakkussat, nalorninaatinik nalilersuinermi aamma inuit ernumanartumik inissisimasut qanoq ikiorniarnissaat pillugit ilisimasat qitiutillugit.
Oqaloqateqarnissat pisariaqartippiuk?
Oqaloqateqarnissamik pisariaqartitsiguit Tusaannga attavigiuaannarsinnaavat. Kinaassutsit isertuullugu aamma akeqanngitsumik sianersinnaavutit.
Oqarasuaat: 80 11 80
SMS: 1899
Yellow Septembereqartitsinikkut neriuutigaarput, inuiaqatigiinni kisimiittutut misigisoqannginnissaanut peqatigiilluta eqqumaffiginninnerulernissarput.