Kommuneqarfik Sermersooq aamma Aalborg Kongres & Kultur Center (AKKC) ArcticExpo – Fishing & Hunting-p Nuummi ingerlannissaa pillugu suleqatigiinniarlutik isumaqatigiipput. Nittarsaassineq apriili 2026-mi pissaaq ukiullu marlukkaarlugit pisartuuvoq uteqqiattoq.
Ungasinngitsumi ArcticExpo-mi nittarsaassineq nutaarluinnaq Nuummi ammarneqassaaq. Tamanna pivoq, Kommuneqarfik aamma AKKC qanimut suleqatigiinnissamik isumaqatigiissuteqarmata, tamannalu isumaqarpoq, Nuummi nittarsaassineq siullerpaamik 21-23 apriilimi ingerlanneqalerpat aalisarneq aamma piniarneq massakkut aallaaviussasut.
AKKC Ilulissani PolarExpo-mik – Kalaallit Nunaanni aalisarnermut piniarnermullu nittarsaassinermut ilisimaneqarluartumut – aamma Aalborgimi DanFish International-imut nunarsuarmi aalisarnermik nittarsaassinermut annerpaamut ingerlatsisuuvoq. Ilisimasat taakkua tunngavigalugit ArcticExpo najukkami, nunami tamarmi aamma nunani tamani suliaqartunut attaveqatigiiffittut patajaatsutut nutaatut ineriartortinneqarpoq.
Kalaallit Nunaanni Issittumilu katersuuffik nutaaq
ArcticExpo Kalaallit Nunaanni Issittumilu aalisarnermut aamma piniarnermut katersuuffiuvoq nutaaq. Nittarsaassineq attaveqatigiinnermik pilersitsissaaq, teknologiimik nutaamik aamma nioqqutinik kiisalu suliassaqarfimmi tamarmit aalajangiisartunik inuussutissarsiortunillu katersuutsitsissaaq.
”Aalisarnermik piniarnermillu ingerlatsineq kommunitsinni inuussutissarsiornermi tunaartanut pingaarnerpaanut ilaapput. Taamaattumik ArcticExpo aqqutigalugu inuussutissarsiornerup ineriartortinnissaanut attaveqatigiiffimmilu najukkami nunanilu tamanit suliaqartut naapittarfissaanni pilersitsinissamut tapertaanissarput nuannaarutigaarput”, Avaaraq Olsen, Kommuneqarfik Sermersuumi borgmesteri oqarpoq.
Nuuk Kalaallit Nunaanni illoqarfiit annersaraat aamma ilutigalugu aalisarnermut, assartuinermut niuernermullu qitiusuuffiuvoq pingaarutilik. Aalisarnermik piniarnermillu inuussutissarsiornerup iluani annertuumik suliaqartut amerlanersaat Nuummi qitiusumik allaffeqarput. 2023-mi Nuummi Umiarsualivimmut kilisaatit 143-ut aamma umiarsuit containerinik usisut tulapput, tamannalu Kalaallit Nunaanni nunami tamarmi nunanilu tamanit niuerfimmut aaqqissuussaaffittut isaaffittut illoqarfiup inissisimanera naqissuserlugu.
Suleqatigiinneq nutaaq patajaatsorlu
Kommuneqarfik Sermersuup aamma AKKC-p akornanni suleqatigiinneq patajaatsumik tunngaveqareerpoq, nittarsaassinermi saqqummersitsisunut tikeraanullu ArcticExpo-mik pissarsiaqarfiusumik tunngavimmik pilersitsisumik.
“Kommuneqarfik Sermersuup suleqatiginera tulluusimaarutigaarput. PolarExpo aamma DanFish International pillugit misilittakkatta nunani tamaneersunut nittarsaassinissamut patajaatsumik tunngaviliivoq, najukkami nunanilu tamanit suliaqartunik kajungilersitsivoq”, Nicolaj Holm, AKKC-mi pisortaq oqarpoq.
ArcticExpo ilisimasanik avitsinissamut, nutaanik suleqateqalernissamut aamma piujuartitsisumik aaqqiissuteqarnissamut allanngorartumik attaveqarfiussaaq – aamma Nuuk Kalaallit Nunaanni aalisarnermut, piniarnermut nutaaliornermullu qiusutut siuttuunissaanut siuarsaassalluni. Nittarsaassineq ukiut allortarlugit ingerlanneqartarpoq. Siulleq 21.-23. apriili 2026-mi, tullia 2027-mi, tamatumalu kingorna ukioq allortarlugu ingerlanneqassaaq – Ilulissani PolarExpo-mik ingerlatsinissaq sioqqullugu, taava taamaalilluni Kalaallit Nunaanni ukioq allortarlugu aalisarneq piniarnerlu qitiutillugit nittarsaassisoqartalissalluni.