Meeqqanut Ilaqutariinnullu politikki piffissami 2025-2035 atuuttoq aqqutigalugu angusat aalajangersimasut siulliit maanna Kommuneqarfik Sermersuumit takuneqarsinnaalerput. Politikki ilaqutariit nukittorsarneqarnissaannik aamma meeqqat inuusuttullu angerlarsimaffiup avataanut inissinneqarsimasut angajoqqaaminnut toqqissisimallutik angerlaqqinnissaannut erseqqissunik siunertalik kommunalbestyrelsimit akuersissutigineqarpoq .
Decembari 2024 aallarnerfigalugu meeqqat inuusuttullu 26-t angerlartinneqarput. Tamanna siunertaqarluni suliniuteqarnikkut anguneqarpoq, matumani ingerlatsivimmit politikkikkut pingaarnersiukkanut sukkasuumik naleqqussaavigineqarmata. Ingerlatsivimmit ilaatigut pingaartinneqarpoq meeqqanut angajoqqaanullu toqqissisimanartumik illersorneqarsinnaasumillu angerlartitsinermut atasumik ikaarsaariartoqarnissaa, matumani angajoqqaat piginnaasaannik nukittorsaanermi ilaqutariinnik ilitsersuisut qitiusumik atuuffeqarlutik aamma meeqqanut sinaakkutissanik aalajaatsunik pilersitsisuussallutik.
Borgmesteri Avaaraq Olsen oqarpoq: “Nuannaarutigaara politikkikkut suliniut nukittooq aamma ingerlatsivimmik qanimut suleqateqarneq aqqutigalugu ima angusaqarsinnaasimagatta, uagut kommunitsinni meeqqanut ilaqutariinnullu iluaqutaasunik angusaqarsinnaalluta. Ingerlatsivimmut aamma sulisunut qujassutissaqaqaagut, taakkua politikkikkut anguniakkanut nutaanut suliamullu tunniusimallutik sukkasuumik naleqqussarput.
Siusissukkut tapersersorneqarneq, ilaqutariit nukittorsarneqarnerat aamma meeqqanik inuusuttunillu sullissinermi erseqqissumik siuneqarneq pillugit politikkikkut anguniakkat taamaalillutik sunniutaat maannakkut takussutissaqalerput. Meeqqat maannangaaq ilaquttaminnut angerlaqqissinnaanissaannut ingerlatsivimmi sukkasuumik naleqqussarneq aalajangiisuulluinnarsimavoq.
Meeqqanut, Ilaqutariinnut Atuartitaanermullu Ataatsimiititami siulittaasoq Poul Petersen, ilanngulluni oqarpoq: “Meeqqat inuusuttullu taamak amerlatigisut maannangaaq angerlaqqissinnaalernerat assorsuaq pitsaasuuvoq. Tassunga ersiutaavoq uagut siusissukkut tapersersuinermik aamma ilaqutariinnik nukittuunik pingaarnersiuinitsivut aqqutissaq eqqortoq ingerlaarfigigipput.”
Angerlartitsinermik suliaq ingerlaqqissaaq aamma Kommuneqarfik Sermersuumit naatsorsuutigineqarpoq piffissami aggersumi meeqqat inuusuttullu amerlanerit ilaquttaminnut uterlutik angerlaqqissinnaassasut.