Aasarpalaaq Festival 2025 aggustip 23-ni 2025 aaqqissuunneqarmat illoqarfimmiunut tamanut ataatsimoorfiulluarpoq. Innuttaasut 3000-t 4000-llu akornanni amerlatigisut ullup ingerlanerani silagissuup ataani nuannaarlutik sammisassarpassuarnut peqataajartormata festivali iluatsilluaqaaq.
Utoqqaat amerlaqisut nipilersortunik tusarnaariarnerat ataatsimooqatigiinnermilu peqataanerat takullugu nuannerluinnarpoq. Festivalerfimmittaaq pisoqarluarpoq, peqatigiiffiimmi nerisassanik, imeruersaatinik allanillu takkuttunut tuniniaallutik ulappupput.
Ilaqutariittaaq meerartallit sammisassani assigiinngitsorpassuarni peqataanissaminnut periarfissinneqarput. Soqutigineqarnerpaat ilagaat qajaq pillugu sammisaqarneq aamma assassorluni workshopperneq, oqaluttuartut, nuannaartorisanik arsaqateqarneq, kinnakkut qalipatsinneq aamma titartaaneq qalipaanerlu. Sammisassattaaq allat nuannisarfiullutillu ataatsimoornermik misigiffiupput.
Nipilersortut nunatsinneersut aamma nuannarineqarluartut appisimaarput, Rasmus Lyberthilu puigunaalluinnartumik naggasiivoq. Taannalu 74-iliilluni inuuissiormat festivalerfimmiittut tamarmik nikuillutik inuuissortoq pilluaqqullugu erinarsorfigimmassuk tusarnaariat killitsipput – taamaalilluni ulloq attortisimanartumik naggaserneqarpoq.
Kulturi, ileqqut aamma nutaaliorneq akuleriikkaangata qanoq ataatsimoorfiulluartigisartoq Aasarpalaaq Festival 2025-p takutippaa. Illoqarfimmi ataatsimoortitsinissaq aamma peqatigiiffiit sulinissaat festivalip anguniagaraa, ataatsimoorlunilu kulturimut tunngasunik misigisaqarnissamut soqutiginnilluartoqartoq takutinneqarpoq.
Aasarpalaaq Festival 2026-p aappaagu aaqqissuunnissaanut qilanaalereerpugut – innuttaasut, peqatigiiffiit, nipilersortut, kajumissutsiminnik ikiuuttut aamma suleqatigineqartut tamaasa ukioq manna puigunaatsumik aaqqissuinerannut qutsavigaagut.
Ukioq manna qujanaq!
