Linda Møller Petersenip aasaq manna eqqumiitsuliornermik ilinniarfimmi naammassisup, Kommuneqarfik Sermersuup Paamiuni Immikkoortortaqarfia Sunngiffik Kulturilu suleqatigalugit Inuusuttut Kulturikkut Illuata iigai kusanartunik qalipappai.
”Inuusuttut Kulturikkut Illuata iigaanik kusassaallunga qalipaasinnaanera nuannaarutigeqaara. Taamatut periarfissinneqarneq uannut immikkuullarissuuvoq. Peroriartorfinni kusassaaqataavunga, kusassaanikka inuusuttuaqqaniit takuneqariaannaapput, neriuppungalu eqqumiitsuliornermik soqutigisallit periarfissagissaarnertik takussagaat,” Linda Møller Petersen oqaluttuarpoq.
Linda sumik ilinniagaqalissanerluni piffissami sivisuumi nalornissutigisimagaluarpaa, taamaattorli eqqumiitsuliornermut ilinnialernissamut ukioq kingulleq periarfissinneqarami nangaassuteqarsimanngilaq.
”Eqqumiitsuliortutut naammasseqqammerpunga, ilinniarninni ilikkakkanik ulikkaarpunga, maannakkut misilissimanngisannik misilittaallunga suliaqarnissannut periarfissinneqarnera qujamasuutigaara,” Linda oqaluttuarpoq.
Paamiuni illoqarfimmik kusassaanissamut aningaasat Paamiut Asasara part 2 (ASA2-miit) atorneqarput. Inuusuttut Kulturikkut Illuanik kusassaanerup saniatigut ”andedam”-imi meeqqat peqatigalugit qalipaasoqassaaq, tassani aamma Linda qalipaatitsisuussaaq.
”Eqqumiitsuliorneq atorlugu illoqarfimmik kusassaanerinnaanngilaq, inuusuttunik kajumilersitsiniarneq aamma anguniarparput. Qeerlutuut qasuerserfigisartagaani kusassaalerutta meeqqat peqatigineqassapput, taakku aamma pinngorartitsisinnaanerminnik misilittaanissaat pingaartipparput. Aaqqissuussanilu taamaattuni Paamiormiunik taamatut suliaqarsinnaaneq nuannertaqaaq,” Paamiuni Sunngiffik Kulturimilu aqutsisoq Dorthe-Marie Mogensen-Fontain unnersiorpoq.
Paamiut Asasara part 2, kommunalbestyrelsemit 1.4 miliuunit koruuninik aningaasaligaavoq. ASA2-mi siunnerfiupput, Paamiuni inuuneq nuannersoq, peqatigiinnerit nuannersut, peqqinneq pilllugu inuusuttunut qaammarsaaneq kiisalu illoqarfimmik kusassaaneq.