Borgmesterit arlallit nunanit issittuneersut sapaatip akunnerani matumani ataatsimeeqatigiinneranni, Kommuneqarfik Sermersuumit Arctic Mayors’ Forum-imi siulittaasuuffik tiguneqarpoq.
Kommuneqarfik Sermersooq – Avaaraq Olsen siuttoralugu – issittumi kommunit 19-it akornanni nunat tamalaat suleqatigiiffiata ataatsimeersuarneranut atatillugu ataatsimeersuarnermi siulittaasoqarfimmik tigusissaaq.
“Suliniaqatigiiffimmi pissarsinartumi suleqatigiilluarnissarput qilanaaraara, pingaartumik issittumi inuiaqatigiinni sullissinermi misilittakkanik aaqqiissutissanillu sammisaqarfiusumi ,” borgmesteri Avaaraq Olsen oqarpoq.
Tikeraarnermi sulisut suliniaqatigiiffimmilu ilaasortat Arctic Frontiers Abroad aaqqissuussinermi peqataapput, Arctic Mayors’ Forum-imi siulittaasuuffimmi sammisat pingaarnerit pingasut immikkut eqqartueqatigiiffigalugit. Tassaapput ilinniartitaaneq, piujuartitsisumik takornariaqarneq aammalu tarnikkut peqqissuuneq, aaqqissuussinermi ilisimasalinnit, aammalu issittumiittut suli pitsaanerusumik inuuffigineqarnissaannik ilungersuuteqartunit oqallisigineqartut.
Arctic Mayors Forum-ip nammineq ataatsimeersuarnera marlunngornermi ingerlanneqarpoq. Tassani sammisat arlaqartut eqqartorneqarput aammalu siulittaasuuffik Avaaraq Olsen-imut tunniunneqarluni. Immikkut sammineqartuni pingaarnerni pingasuni Arctic Mayors’ Forum qinigaaffimmi matumani ataaseq pingaarnertut ukkatarineqassaaq: tarnikkut peqqissuuneq.
“Issittumi tarnikkut peqqissuuneq pillugu ilungersuuteqarnerup nukittorsarneqarnissaa ilanaaraara. Tamassuma ukkatarineqarnissaanut pisariaqartitsivugut,” Avaaraq Olsen oqarpoq. Kommuneqarfik Sermersooq Arctic Mayors Forum-imi siulittaasuussaaq 2027-p tungaanut