Kommuneqarfik Sermersuumi Kommunalbestyrelse aalajangerpoq Nuummi immikkut ittumik eqqagassanik annertuunik katersineq aallartinneqassasoq. Suliniut aasap ingerlanerani illoqarfiit pingaarnersaat saligaannerulersinnissaanut tikilluaqquserpalaarnerulernissaanullu iluaqutaassaaq – illoqarfimmi innuttaanut aamma aasaanerani Nuummi tikeraartorpassuarnut.
Aalajangiussaq Illoqarfiit pingaarnersaat pillugu periusissiaq Nuuk 2035-mut takorluukkanik piviusunngortitsinissamut suliamut ilanngussaavoq, matumani anguniakkani ilagissallugu, Nuuk tikilluaqquserpalaartutut paarilluakkatullu misigineqarnissaa.
”Kissaatigaarput, innuttaasut illoqarfitsik tulluusimaarutiginissaat, takornariallu takunneqqaarnerminni pitsaasumik takusaqassasut. Taamaattumik Nuuk 2035-p sulianerani innuttaasut kissaataat malillugit namminneq oqaasertalersueqataanerannut toqqaannartumik akissutigalugu maanna timitaliilluta immikkut ittumik eqqagassanik annertuunik katersilluta alloriarpugut,” borgmesteri Avaaraq Olsen oqarpoq.
Innuttaasut kissaataasa timitalerneqarnerat
Illoqarfiit pingaarnersaat pillugu periusissiaq annertuumik peqataatitsinermik tunngaveqarpoq, matumani innuttaasut 230-t sinnerlugit workshoppertitsinernut peqataallutik, aamma apeqqutit akissutaannik immersuiffiit 650-ingajannit immersorneqarlutik. Immersukkani ersarissumik sammineqartoq tassaavoq illoqarfik saligaatsuunerunissaanik kissaatigineqartoq aamma ataatsimooqatigiinnernut illoqarfimmilu inuunermut pitsaanerusunik sinaakkuteqarnissaq.
Immikkut ittumik eqqagassanik annertuunik katersineq ukiumoortumik aasaanerani saliinermik ilassuteqarpoq aamma periusissiami immikkoortumi pingaarnersiugaasoq “Illoqarfipput, ataatsimoorfipput” tapersersorneqarpoq.
Sinaakkusiussat iluanni aningaasalersuisoqarnissaa
Saliinissaq illoqarfiup aserfallatsaaliornissaanut ingerlatsinermut aningaasaliissutaasut pioreersut iluanni suliniutigalugu naammassineqassaaq. Tassa imaappoq, suliniummut atatillugu immikkut aningaasartuuteqartoqarnissaanut innuttaasunit naatsorsuutigineqassanngitsoq.
Kommuneqarfik Sermersuup Nuummi innuttaasut tamarmik kaammattorpai suliniummut suliniuteqaqataassasut aamma eqqagassanik annertuunik aallertoqarsinnaanera atorluassagaat. Ulluliussat suliamillu ingerlatsinissaq pillugit paasissutissat annertunerusut piaarnerpaamik nalunaarutigineqarumaarput.
Eqqagassanik annertuunik nalinginnaasumik katersineq
Eqqagassanik annertuunik nalinginnaasumik katersinissamut utaqqisinnaanngikkuit, taava eqqagassanik nalinginnaasunik katersinissaq piliivippoq. Taanna pillugu uani paasisaqarnerusinnaavutit: