Maani najugalinnut tikeraanullu alloriarneq pingaarutilik maanna naammassineqarpoq, “ammukajaami” qaartiterineq iluatsilluartumik naammassineqarmat. Suliami sumiiffimmi sukisaarsaarnermi ineriartornissamut periarfissat ingerlaffissallu pitsanngorsarneqarlutillu ammaassiffigineqarput – qujanartumik snescooterertartut peqatigiiffiat “Qamutit”, kajumissutsimik suleqataasut aammalu tapersersuisut arlallit akornanni suleqatigiittoqarneratigut.
Suliaq piviusunngortinneqarpoq Namminersorlutik Oqartussat attaveqaasersuutinut minnerusunut aningaasaliissutaannit taperneqarnikkut, soorlu Kommuneqarfik Sermersuup Inuussutissarsiornermut immikkoortortaqarfia aaqqissuussisoralugu snescooterertartut peqatigiiffiat “Qamutit” suleqatigalugu.
”Suliniutip iluatsilluarnissaanut sinaakkutissat pilersikkusullugit kissaateqarpugut – tamannalu ataatsimoorunneqarmat iluatsipparput,” inuussutissarsiornermut pisortaq, Mads-Daniel Skifte oqarpoq.
Nunamukarnermi isumannaatsumik ajornannginnerusumillu aqquteqalerneq
Suliniutip naammassinerata kingunerisaani maani najugallit takornariallu isumannaannerusumik aammalu pinngortitamut ungasiarnerusumut pisunnissaminnut periarfissaqalersinneqarput. Taamaaliornikkut pisuttuarnissamut, silamiinnissamut pinngortitamilu misigisassarsiornissamut periarfissaqarnerulerpoq – inuttut pitsaasumik inuuneqarnissamut aammalu maani takornarialerinermut iluaqutaasussamik.
Suleqataasimasut tamaasa qutsavigaagut.