Asasakka innuttaasut tamassi – maani Nuup Saavani inuiattut ullorsiornitsinni najuuttusi. Siullermik inuiattut ullorsiornitsinni uummammit pisumik pillungaaritsi.
Kingumunaasiit inuiattut ullorsiornerput maani peqatigalusi aallarnissavarput. Ukioq manna ullumeqqissaaq nammineerluta erfalasutta amuneqaqqaarpiarneraniit ukiut 40-nngortorsiorpagut. Ukiuni kingullerni, pisuni assigiinngitsuni, erfalasutta ataatsimoorussatta pingaaruteqassusia misigisaqattaarparput. Erfalasorput inuiattut ullorsiornitsinni taamaallaat tulluusimaarluta amusanngilarput, aammali nittarsaattarparput timersornerup iluani, nalliuttorsiornerni, aammali massakkut nunat tamalaat akornanni kinaassutsitsinnik nammineerlutalu oqartussaassuseqarnitta tatineqannginnissaanik ersersitsinermi takutittarlugu. Erfalasorput nammineq kinaassuseqarnitsinnik takutitsisuuinnarani aamma inuiaqatigiinni qanorluunniit tunuliaquteqaraluarutta inuiattut ataatsimoorfigaarput.
Uagutsinnit siulliullutik maani Issittumi nunaqartut, siuligut, nuna manna ineriartortitseqataaffigisimavaat uagut maani inuuginnarsinnaanissarput qulakkeerniarlugu. Nunami pinngortitagissaartumi peqqarniissinnaasumili uumaannarnissamut pisariaqartinneqartut tassaapput ataqatigiinnissaq aamma nukiit tamarmik tunniussaqaqataallutik kivitseqataanissaat. Taamaattumik naak ullumikkut nunatut, aammali kommunitut, inuttullumi ataasiakkaatut killiffigut assigiinngitsutigut imaannaanngissinnaasutut taaneqarsinnaagaluartut, taamaattoq aamma inuiaqatigiittut kommunitullu killiffitsinni nukittuffigisagut ullormi matumani ersarissarusuppakka. Taakkuummata aqqutini suniluunniit qaangiiniarnissatsinnut nukinnik aallerfigalugillu ataatsimoorfigisartakkagut. Inuiaqatigiiuvugut ataatsimuullaqqissut, ikiuukkumatuut, kulturikkut nukittuumik inissisimasut, naleqartitatsinnik takutitsillaqqissut kiisalu qanorluunniit aqqusaagaqaraluaraangatta taqitsitassaanngitsut. Soorlu ullumikkut maani nikorfanitta tamanna uppernarsaraa.
Nunatut nammineerusuttutut inissisimatilluta, kommunimi uagut innuttaasut pillugit sulinitsinni sapinngisamik ataqqinnittumik ataqatigiissumillu sullissinissarput ukkataraarput, sumiiffinni assigiinngissutsit ataqqillugit, inissaqartillugit peqataatillugillu. Kommunitut nukittuutut inissinnissamut innuttaasut nukittuut pisariaqartippagut, tamannalu aallartittarpoq meeraanermiit pitsaasumik toqqammavissilluarneqarnikkut, kiisalu inersimasut akisussaaffimmik tigusillutik maligassiuinerisigut. Taakkununnga sinaakkutit pitsaasut pilersinniarlugit kommuneqarfitsinni meeqqanut ilaqutariinnullu nutaamik politikkiliornitsinni meerartatta pisariaqartitsisut ikiorneqarnerisa saniatigut ilaqutariit tamarmiullutik ikiorneqartalernerat siusissukkullu iliuuseqartarnerit ukkataraagut. Borgmesteritut kommunimi qinikkat sinnerlugit innuttaasuususi sutigut tamatigut peqataatinneqarnissarsi tusaaneqarnissarsilu pingaarteqaakka. Qanimut oqartussaaqataaneq angusinnaavarput aatsaat peqatigiikkutta, peqatigiikkaangattami nukiit siunertamut eqqortumik aatsaat atorsinnaalersarpagut angusassanullu pilertornerusumik qanillattorsinnaalersarluta.
Uani qinigaaffimmi nutaami atuutileqqammersumi, inuup kiffaanngissuseqarneranik, aamma inooqataanikkut nammineerluni inuunerminik ilusilersuisinnaalluni akisussaassuseqarneranik upperinninneq tunngavigalugu, suleqatigiinnissamik isumaqatigiissuteqarpugut. Tamanna aamma isumaqarpoq innuttaasut sumiikkaluarunilluunniit naligiimmik periarfissinneqarnissaat pingaartikkipput. Kommunitut alloriaqqinnissatsinnut nukiit piginnaanerillu pigisagut atorluassavagut inerisaavigeqqissallugillu. Taamaattumik nukigut akaareqatigiinnermut, ataqqeqatigiinnermut kivitseqatigiikkusunnermullu saatillugit immitsinnut siuariartortissaagut.
Inuiaqatigiittut susassaqatigiittuartuusimavugut, tamannaavorlu aamma suniluunniit aaqqiissutissani tamaginni qitiulluinnartoq. Kommunitsinni susassaqarfiit assigiinngitsut peqatigalugit kommune nukittooq pitsanngorsaanerillu pisariaqartut ingerlatissavagut. Inuussutissarsiortut, kajumissutsimik suliaqartut, kikkulluunniit innuttaasut tamarmik peqatigiilluta kivitseqatigiinnissarput qulakkeersinnaavarput aporfissaasinnaasut pivallaarnagit kisiannili periarfissanut, aaqqiissutissanut, pitsanngorsaatissanut ineriartorfissanullu tappikkutta. Upperaarami tamatta tunniussassaqartugut iliuuseqaqatigiissinnaasugullu, aamma ataatsimut tapersersoqatigiinneq aallaavigalugu kattukkaangatta, soorlu timersornerup iluani, nukik pilersittagarput qanoq angitigisarnersoq takusareerparput misigisareerlugulu. Taannalu nukik pilersittagarput ulluinnarni timitalimmik aamma pigisariaqaripput isumaqarpunga.
Naggataatigut ullormi matumani inuiattut ullorsiornitsinni oqaatigerusutama ilagaat Kommuneqarfik Sermersuumi – Kitaaniit Tunumut – sineriammeersunik innuttaasorpassuaqarfiusumi, siuariartorneq ineriartornerlu pilersittagarput assut tulluusimaarutigigakku. Anersaaq taanna pigalugu siunissaq kingulissatta kingornutassaat pillugu patajaatsumik sulissaagut, immitsinnut kaammattoqatigiinneq, nersualaarneq, upperineq ikioqatigiinnerlu atorlugit. Taakkuummata inoqatitta suli pitsaanerusumik inissinnissaannut sunneeqataasartut. Kommunitsinni unammillernartut akimorlugit takorluugaqartarpugut mikinngitsunik, soorluttaaq aamma Nuuk tassaalersikkusukkipput Issittumi kulturikkut illoqarfiit pingaarnersaat. Taamatut oqareerlunga naqissuseqqiinnassavara kommunitsinni tamavissi pisariaqartinneqarassi, aammalu kommunerput ilusilersortuassavarput tamatsinnut kinguaariinnullu tullernut najugaqarfigiuminarsarlugu. Pisussaaffitta tassa pingaarnersaat. Nuannaarutigaara maani peqatigalusi inuiattut ullorsiornerput erfalasuttalu ukiunik 40-nngortorsiornerani inuiattut tulluusimaarutigisatsinnik kinaassuseqarluta ulloq manna aallarnersinnaagatsigu.
Tamassi uummammik pisumik inuiattut ullorsiornitsinni pilluaqqigitsi ullorsiorluarisilu!