Kommuneqarfik Sermersuumi Ingerlatsinermut immikkoortortaq ukioq manna sanaartugassani aserfallatsaaligassanillu suliaqarluni aallarteruttorpoq. Kommunimi sumi tamaani asfaltilersuilluni iluarsaassisoqarpoq, kusserngit salinneqarlutik, ungalut iluarsaanneqarlutik aammalu illoqarfinni illoqannginnersani aasaq manna sammisassaqartitsinermut atorneqarnissaat piareersarneqarput.
Aqquserngit asfaltigassallu
Nuummi Materialegården asfaltilersuilluni suliaqarpoq, aqquserngit sinarsuinik taarsersuisoqarpoq aammalu kusserngit salinneqarlutik. Aamma Paamiuni asfaltilersuisoqarpoq aqquserngillu sinarsuinik taarsersuisoqarluni, aammalu aasaq tamaat aqquserngit iluarsaanneqassapput, sila atoruminarneruleriarpat. Asfaltiliuut Tasiilamut apuunneqarpat ingerlatilerneqassaaq, tamaanilu ukiup ingerlanerani aqquserngit aserfallassimanerinik iluarsaassinissaq ajornannginnerulissalluni.
Ungalut aamma iliveqarfiit
Kommunimi sumiiffinni arlalinni ungalunik aserfallatsaaliisoqarlunilu iluarsartuussisoqarpoq – ilaatigut Nuummi Paamiuni iliveqarfiit sinaanni. Nuummi Perngarfimmi iluarsartuussineq aallartereerpoq aammalu sapaatip akunnerani uani naammassineqarnissaa naatsorsuutigineqarluni, tamatuma kingornagut ungalut qalipanneqarumaarlutik. Ungalut Noorlernut aamma Nuussuarmiittut misissorneqarnissaat aamma pilersaarutaavoq. Paamiuni iliveqarfiup nutaap uiguneraniittoq iluarsaanneqareerpoq, aammalu aasap ingerlanerani qaqortumik qalipanneqarnissaa naatsorsuutigineqarpoq.
Illoqarfinni illoqannginnersat aqqutissallu
Paamiuni Bella Vistamut majuartarfiit naammassineqareerput, taamaalilluni nasiffik maanna pitsorluttunit majuarfigineqarsinnaalerpoq. Taava aamma illoqarfiup ilisarnaataa, “Ikaartarfissavaq” qalipanneqarpoq, pavillonit ilanngullugit. Illoqarfiup illoqannginnersaani nutaanik takisuunik issiavilersuisoqassaaq siaasaasoqartillugu qajannaatsunik qallikkanik, aamma takornarianut illoqarfiup assinginik inniminniisoqarpoq taakkulu kommunimi inuussutissarsiornermut immikkoortortaq suleqatigalugu ikkussuunneqassapput.
Nuummi sullorsuup eqqaani majuartarfiit taarserneqarnerat maannakkut suliarineqarput.
Saliineq isaterinerlu
Eqqagassanik annertuunik saliineq piiaanerlu Tasiilami inoqarfinnilu eqqaaniittuni ingerlanneqarpoq. Angallatit pisoqqat piiarneqassapput angallatinut atorneqartunut inissaqarnerulersitsiniarluni. Paamiuni illoqarfimmi inissiarsuarnik illunillu isaterineq ingerlanneqarpoq, ilaatigut tigooraavimmi aammalu illoqarfiup angallatinik iluarsaasarfiani. Sulineq innuttaasut eqqarsaatigalugit ingerlanneqarpoq.
Nuummi eqqagassanik annertuunik katersineq aallartinneqassaaq, tamanna pillugu kommunalbestyrelsip akuersissutigeqqammerpaa immikkut ittumik iliuuseqartoqarnissaa.
Nakkutilliineq aserfallatsaaliinerlu
Arsummi Qeqertarsuatsiaanilu nakkutilliiartortoqarnikuuvoq aammalu sumiiffinni sulisut innuttaasullu oqaloqatigereerlugit suliassanik tunniussuisoqarluni. Sumiiffinni marlunni aserfallatsaaliinissamut pilersaarutit suliarineqareerput. Aamma Paamiuni ingerlatsiviit akimorlugit aserfallatsaaliinerit ingerlanneqareerput, ilaatigut timersortarfimmi.
Umiarsualivinnik alliliinerit siunissamilu pilersaarutit
Tasiilami umiarsualiviup ilorpasissortaata itinerulersinneqarnissaaa piareersarneqarpoq, tamannalu umiarsuaq atortussanik pisariaqartinneqartunik pajuttoq tikinniariarpat aallartinneqassaaq. Paamiuni nutaamik illoqarfiup tamakkiisumik pilersaarusiorneqarnera suliarineqaleruttorpoq, ilaatigut illoqannginnersanik kusassaanissaq aammalu innuttaasunut tikeraanullu pitsaanerusunik atortoqalernissaq ukkatarineqarluni.
Nuummi Kangerlukasik avannarlermi puttasut taarsersorneri nuussornerilu ingerlanneqarput, aasap ingerlanerani naammassineqarnissaat naatsorsuutigineqarluni.