Pitsaanerusumik suleqatigiinnissaq ataatsimullu paasinninnerunissaq qitiutillugit sumiiffimmi ataatsimi kommunalbestyrelsimi, nunaqarfinni aqutsisuni najukkanilu ataatsimiititaliani qinikkat siullermeerlutik ataatsimoornerat Kommuneqarfik Sermersuumi naammassineqaqqammerpoq.
Sapaatip ataasinngornerullu ingerlanerini qinikkat 60-it sinnerlugit Qinikkat katersuunnera peqataaffigaat, Kommuneqarfik Sermersuumi suliniut nutaaq kommunimi tamat oqartussaaqataaneranni immikkoortut akimorlugit suleqatigiinnerup nukittorsarneqarnissaannik siunertaqartoq, aamma tamat oqartussaaqataaneranni qaleriit assigiinngitsut akimorlugit suliffiup iluani suleqatigiinnermik nukittorsaanissamik innuttaasunullu iluaqutaasussamik ataatsimut aalajangiinissamut pitsaanerusumik toqqammaviliisussamik siunertaqartoq.
Aaqqissuussami ilaatigut saqqummiussisoqarpoq, gruppikkaarluni suliaqartoqarpoq oqaloqatigiittoqalaarlunilu, ilaatigut peqataasut ataatsimiititat aqutsisuuffitsillu akimorlugit akuleriisinneqartarlutik. Peqataasut misilittakkaminnik avitseqateqarnissamik, attaveqaateqalernissamik aamma akisussaaffeqarfimmi suleriaatsimilu paasisimasaqarfiginerulernissaannik periarfissinneqarput.
“Katersuunneq matuma ittoq piffissami sivitsortumi piviusunngortikkusullutigu. Naapinnissamut akimorlugulu misilittakkanik avitseqatigiinnissamut periarfissinneqarnerput assut isumaqaqaaq. Tamat oqartussaaqataaneranut nukiuvoq,” borgmesteri Avaaraq Olsen oqarpoq.
Pilersaarut sapaatikkut ataatsimut tikilluaqqusinermik, saqqummiussinernik suleqatigiillu nukittorsarneqarnerinik aallartinneqarpoq. Tamatuma kingorna qanimut oqartussaaqataaneq pillugu saqqummiineq, gruppikkaarneq aamma pineqartut pingasut – kommunalbestyrelse, nunaqarfinni aqutsisut najukkanilu ataatsimiititaliat – ulluinnarni politikkikkut suliaqarnermi qanoq imminnut atorluarsinnaanersut pillugit oqallinnerit pipput. Ataasinngornermi nunaqarfinni aqutsisut aamma najukkani ataatsimiititaliat kommunip sulinerani atuuffii sammineqarput. Ingerlatsivinniit pisortat peqataasunit naapinneqarput, innuttaasunik peqataatitsineq eqqartorneqarpoq aamma akunnerup naanera isumassarsiorfigalugu siunissami suliat pilersaarusiornissaannut siunnersuusiortoqarpoq.
