Aningaasaqarnermut Inuussutissarsiornermullu Ataatsimiititap ulloq 3. juuni 2025 ataatsimiinnermini aalajangerpaa illoqarfiup ilaanut pilersaarutissatut siunnersuut 4B5-2-B tamanut tusarniaassutigineqassasoq.
Siunertaa
Nuummi inuttusiartornera ilutigalugu angallatit malunnartumik amerliartorput. Tamanna nunaminertamik ukiuunerani umiatsianut inissiivimmik pisariaqartitsinermik annermik pilersitsivoq.
Illoqarfiup ilaanut pilersaarummi matumani siunertarineqarpoq Nuummi angallatinut inissiivimmik ataatsimoortumik aamma siunissamut qulakkeerinnissutaasumik pilersitsisoqassasoq. Illoqarfiup ilaanut pilersaarusiorfiusoq 1 ha.-imik angallatinut inissiivioreersoq ataatsimoortillugu annertuneruvoq. Alliliinermi siunertarineqarpoq inissiivissanik piumanerulerneq aaqqiissuteqarfiginissaa aamma inissiivissat siunissami periarfissaqartinnissaat qulakkeerneqarnissaat.
Pilersaarummi siunertat tunngaviillu:
- Angallatinut inissiivimmut nunaminertamik periarfissiineq aamma siunissamut qulakkeerinninneq.
- Ukkusissamit apummit iminnguuttumik passussisinnaaneq.
- Pinngortitaq nunaminertap eqqaaniittoq erseqqissumik killeqarfeqarneranik qulakkeerineq.
Tamanut oqallisissiaq
Pilersaarutitut siunnersuut piffissami 11. juunip – 23. juulip 2025-ip tungaanut tamanut tusarniutigineqassaaq.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq. Oqaaseqaatit kingusinnerpaamik juulip 23-at 2025 uunga nassiunneqassapput: plan@sermersooq.gl
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Inatsisinut tunngasut
Illoqarfiup ilaanut pilersaarutissatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut sanaartorfigineqassanngillat allatigulluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
Pilersaarut uani atuarneqarsinnaavoq
Illoqarfiup ilaanut pilersaarutissatut siunnersuut kommunip nittartagaani www.sermersooq.gl-imi tusarniaassut ataani atuarneqarsinnaavoq, kommunip innuttaasunik kiffartuussiviinut imaluunniit Sanarfinermut Avatangiisinullu Ingerlatsivimmut 36 74 00-imut saaffiginninnikkut pissarsiarineqarsinnaavoq.