Atuarfik Inussuup pisortaarigallarsimasaa annertuumik suliniuteqarpoq atuarfiillu marluk ikaarsaariarfiup nalaani aqutarai – KNR-ip allaaserinninneratut ”atuarfik imaqanngitsoq”-mik isumaqarani.
KNR-ip allaaserisaa “Nuummi atuarfik nutaaq millionilinnik akeqartoq suli inoqanngitsoq”, ulloq juunip qulingiluaanni saqqummiunneqartoq Kommuneqarfik Sermersuup akuerisinnaanngilluinnarpaa. Atuarfiup pisortarisimasaata atuuffia aamma Atuarfik Inussuup ammarnissaanut sulisimanera eqqunngitsumik saqqummiunneqarput.
Pingaartumik ima allaaserinninneq ilumuunngilaq: “Atuarfiup pisortaata qaammatialunni taakkunani atorfeqarnermini atuarfik imaqanngitsoq pisortaaffigaa, Kommuneqarfik Sermersoorlu qaammatini taakkunani atuarfimmi pisortamut 64.500 koruuninik akissarsiaqartitsilluni. “
Atuarfiup pisortarisimasaata qaammatini 16-ini atorfeqarnermini Atuarfik Samuel Kleinschmidt (ASK) aamma Ukaliusap Atuarfia (USK) ataatsimoortilerniarlugit Atuarfik Inussummut nuunneqarnissaat ilungersorluni sulissutigaa. Taassuma atuarfiit marluk aquppai, saniatigullu atuarfittaassaq piareersaateqarfigalugu, atorfinitsitsinerit isumagalugit, atuarfiup perorsaanermi tunngavissaanik ineriartortitsilluni aamma meeqqat atuarfiannik nutaamik ammaaniarluni naqqaniit suliassarparujussuit annertuumik pilersaarusiorlugit.
”Atuarfiup pisortaata suliaqarani akissarsisimasutut allaaserineqarnera naleqqunnanilu kukkuneruvoq. Taanna suliaqangaatsiarpoq, tunniusimalluni suliniuteqarluni aamma Atuarfik Inussuup tamakkiisumik pilersaarusiorneqarnerani pingaaruteqarsimaqaluni,” Meeqqanut, Ilaqutariinnut Atuartitaanermullu Ataatsimiititaliami siulittaasoq, Poul Petersen oqarpoq.
Atuarfiup pisortaa ikaarsaariarnerup ingerlanerani pingaarutilinnik arlalinnik suliaqarpoq, minnerunngitsumik atuartut, sulisut aamma angajoqqaat atuarfimmut piareersarluarneqarsimalluni aaqqissuulluagaasumut tikilluaqqujumallugit aamma perorsaanermut tunngasunik erseqqissunik tunngaveqarnissaa pillugu sulisimalluni. Atuarfinnik marlunnik aqutsineq nutaamillu pilersitsiniarluni sulineq imaannaanngitsuuvoq, atuarfiullu pisortarisimasaa sulinermi pingaarutilittut inissisimasimalluni.
”Taassuma sulisimanera pillugu qujassutissaqarfigeqaarput. Paatsuunganartup aaqqinneqarnissaa uatsinnut pingaaruteqarpoq, atuarfiullu nutaap ammarnissaanut piareersaateqarluni sulisimaneq nersortariaqarpoq. Taamaattut suliassat allaffimmi imaqanngitsumiit aaqqinneqarsinnaanngillat – aqutsineq, misilittakkat aamma sulerulunneq pisariaqarput,” Poul Petersen erseqqissaavoq.
Atuarfik Inussuup ammarnissaanut tunngatillugu pissutinut piviusunut naapertuunerusumik aamma inuit piviusunngortitseqataasut pillugit KNR-ip allaaserinniniissaa Kommuneqarfik Sermersuup neriuutigaa.