Nuummi aqquserngit nungullarluinnaqqapput, tamannalu innuttaasorpassuit nukillalaarnartippaat. Taama inissisimasoqarnera arlalinnik peqquteqarpoq – aaqqiisoqarnissaalu maanna tamaviaarutigineqarpoq.
”Inuit biilernerminni aqqusinerni putut qatsukkaat nalunngilarput. Neriorsuivallaarsinnaanngilagut, kisiannili pisinnaasarput malillugu pisiariaqarnerpaat aaqqinniassavagut,”, Teknikkeqarnermut Avatangiisinullu Ataatsimiititami siulittaasoq, Uju Petersen oqarpoq.
Asfaltiliorfik Munckimiit 2020-mi tiguneqarmalli mittarfissuup asfaltilersorneqarnissaa pingaarnerutinneqarpoq. Tamannalu Nuup aqqusernginik suliaqarsinnaanermut killeqarnerulersitsivoq. Nuummittaaq biilit amerliartornerat takuneqarsinnaavoq, aqquserngillu nungullariartornerunerannut sunniuteqarpoq. Assersuutigalugu nalunaarsuinermi takutinneqarpoq Sipisaq ullormut 19.000-riarluni angallavigineqartartoq.
Ukiup ingerlanerani asfaltilersuiffiusinnaasoq sivikitsunnguusarpoq, silalu ukiuni kingullerni asfaltilersuinissamut tulluarneq ajorpoq. Asfalti manissarneqaruni minnerpaamik 120 gradenik kissassuseqassaaq, silalu tallimat sinnerlugit kiappat aatsaat asfaltilersuisoqarsinnaavoq. Maajimi aput aamma juunimi juulimilu sialuk ullunut asfaltilersuiffiusinnaasunut ikilisaataapput.
Mittarfissualiorneq maanna naammassisimalerpoq, taamaattumillu Nuummi aqquserngit isumagineqarsinnaanerulerput. Aqqutit nungullarsimanerpaat suliarinissaannut pingaarnersiuinerit aallartinneqareerput aamma aasaq manna suliarineqartussat naammassisinnaajumallugit aningaasanik amerlanernik qinnuteqartoqarpoq.
”Qaqugu sumilu asfaltiliornissaq uagut nammineq maanna aqussinnaanngorparput. Aqquserngit iluarsaannissaannut periarfissaqarnerungaatsialerpugut,” Uju Petersen oqarpoq nangillunilu:
”Suut tamaasa ataatsikkut aaqqissinnaanngilagut, aallartippugulli – aqquserngit iluarsaassassaanerpaat aallartissutaassapput.”