Tasiilami innuttaasut attaveqaasersuutinut, angallannermut politikkikkullu pingaarnersiuinermut tunngasuni unammillernartut pillugit misigisaminnik oqariartuutigisaat Kommuneqarfik Sermersuumit paasineqarlutillu tapersersorneqarput.
“Tunumi ulluinnarni atukkanut aamma inuunerissaarnissamut sunniuteqartut pillugit ernummateqarneq paasisinnaalluarparput,” borgmesteri Avaaraq Olsen oqarpoq. Aammattaarli uggornartutut isigaa kommunip iluani Nuup avataani nammineerluni aalajangiisinnaassuseqarnerup annertusarneqarluni ingerlanneqarnerani unammilligassat annertusineri.
Timmisartuussinernut pilersuinernullu aqqutit allanngortinneqarnerat Tasiilamut nunaqarfinnullu eqqaaniittunut annertuumik ajornakusoortitsiffiulerput. Timmisartukkut nassiussisarnerit tamarmik, siornatigut toqqaannartumik Islandikkoortinneqartartunut taarsiullugu maanna Nuuk aqqutigalugu assartorneqartarnissaannik allannguineq kinguneqarpoq nassiussat sivisunerusumik ingerlaartalernerannik aammalu nioqqutissanik pingaarutilinnik patajaatsumik pilersuiniarnerup ajornakusoornerulerneranik. Tamanna inuussutissarsiortunut innuttaasullu ulluinnarni atugaannut pitsaanngitsumik sunniuteqarpoq.
Borgmesteri Avaaraq Olsen naqissusiivoq: ”Kommuneqarfik Sermersooq unammilligassanut taakkununnga iliuuseqarniarluni siornatigut suliniuteqartareertarpoq, ilaatigut inuussutissarsiornermik aamma attaveqaasersuutit pillugit isumasioqatigiissitsisarluni, taakkunani Namminersorlutik Oqartussat suliffeqarfiillu attuumassutillit peqataatinneqartarput. Ataatsimoorluni kivitseqatigiinnissamut pisariaqartitsineq peqataasunit isumaqatigiissutigineqarsimavoq, taamaattorli isumaqatigiinnerup tamatuma timitalersorneqarnissaa pingaaruteqarluinnartuuvoq.”
Borgmesteri innuttaasunut, matumani Tunumi ineriartortitsinissamut ataatsimut suliniuteqarnissap pisariaqassusianik kissaateqarlutik isummaminnik ersersitsisunut, paasinnippoq. Ataasiakkaanik suliniuteqartoqarnissaa naammanngilaq; ataatsimut periusissiaqarnissaq, Tunumi piujuartitsisumik ineriartornissaq qulakkeerniarlugu kommune, Namminersorlutik Oqartussat suliffeqarfiillu suleqatigiinnissaat pisariaqartinneqarpoq.
”Attuumassuteqartunut tamanut kaammattuutigissavarput oqaloqatigiinnermik aallartitseqqiisoqassasoq, tamatumuunalu Tasiilami innuttaasut unammilligassaannut tunngatillugu tigussaasunik iliuuseqartoqarnissaanut pisussaaffiliisumik aaqqiissutissarsiortoqassasoq. Nunatta tamarmiusup ineriartorneranut Tunup kinguussaatinneqannginnissaa qulakkeerniarlugu maanna iliuuseqarnissarput pingaaruteqarluinnarpoq,” borgmesteri naggasiivoq.