Naluttarfik Malik juulip aallaqqaataani 2025-miit juulip aallaqqaataani 2026-ip tungaanut iluarsartuunneqassasoq pilersaarutaavoq – iluarsartuussillutilli suliaqartussat neqeroorusiornissaat apeqqutaammat qaqugorpiarneq pinissaa suli aalajangerneqanngilaq. Iluarsartuussineq qaammatit arfinillit aqqaneq-marlullu akornanni sivisussuseqassasoq ilimagineqarpoq.
“Suliarujussuunikuuvoq, maannali kiisami pisussanngorpoq,” Teknikkeqarnermut Avatangiisinullu Ataatsimiititami siulittaasuugallartoq, Uju Petersen, oqarpoq. “Suliniut kinguartinneqaqattaaginnarpat suliassartaa annertunerulerlunilu piffissartornarnerulissaaq. Maanna pilersaarusiaq aallaavigalugu naluttarfiup matoqqanissaa qaammatit arfinillit aqqaneq-marlullu akornanni sivisussuseqassaaq – kinguarsaqqissimagutsigu matoqqatitsineq sivisunerusimassagaluarpoq.”
Maliup iluarsartuunneqarnissaa qangali eqqartorneqalerpoq, politikkikkullu ataatsimoorluni sulinerup inerneraa. Suliaq Teknikkeqarnermut Avatangiisinullu Ataatsimiititaliap aamma Kommunalbestyrelsep arlaleriarlutik oqaluuserisarpaat, atuisartullu siunnersuisoqatigiivisa oqariartuutaat, innuttaasut siunnersuutaat aamma tamanut tusarniaanermi akissutigineqartut tusaaniarneqarput. Piffissamut pilersaarut, aningaasanut missingersuutit aamma suliassap annertussusaa pillugit susassaqartut tamarmik pitsaanerpaamik piareersimasinnaaqqullugit kommunimi Suliniutinut immikkoortortaqarfik misissueqqissaareerpoq.
Iluarsartuussinissaq maanna suliariumannittussarsiuunneqarpoq, suliffeqarfiillu soqutiginnillutik neqeroorusiullattaarput. Neqeroorusiornermi periarfissat assigiinngitsut ilanngunneqarput, tassa imaappoq suliarinnikkusuttut assigiinngitsunik ilanngussaqarusukkunik neqeroorusiaminni ilanngussisinnaapput. Taamaammat toqqarneqartussat sunik ilanngussaqarusunnerat apeqqutaalluni piffissap qanoq sivisutiginissaa aalajangerneqassaaq. Suliariumannittussarsiuussineq naammasseriarpat sulinerup qanorpiaq sivisutiginissaa inissinneqarumaarpoq.
Naluttarfiup tamakkingajavillugu nutarterluinnarneqarnissaa uani pineqarpoq. Suliassat pingaarnerpaat ilaatigut ukuupput:
- Naluttarfinnik tamanik naqqaniit iluarsartuussineq, soorlu naqqit iikkallu qalliutaannik ukiuni 30-ni atasinnaasunik taarsersuineq
- Naluttarfimmi qullernik taarsersuineq
- Inunnut innarluutilinnut isaarissanik pitsanngorsaaneq
- Silaannarissarfinnik taarsersuineq
- Ikuallattoqarnerani isumannaallisaanermi malittarisassat atuuttut malillugit nutaamik aaqqissuussineq
- Atisaajartarfinnik tamakkiisumik iluarsartuussineq
- Illutap iluanik aaqqissuussaaneranillu tamakkiisumik nutarterineq
- Naluttarfiup tamakkiisumik siunissami ingerlanissaanik atuuffeqarnissaanillu qulakkeerinninneq
Carla Villadsen naluttarfik Malimmi aqutsisuuvoq, suliniullu pillugu ima oqarpoq: ”Taama sivisutigisumik matoqqanissarput soorunami ajuusaarnarpoq. Innuttaasulli aamma naluttarfimmut pitsaanerusumut, kusanarnerusumut atorneqarnissaminullu tulluarsagaanerusumut tikilluaqqunissaat qilanaareqaarput. Naluttarfiup iluarsartuunneqarnerata nalaani sulisutta ilaat kommunip iluani suliffinni allani suligallassapput, ilaallu atortorissaarutit nutaat atuutilertussat pikkorissarfigissavaat. Matoqqagallarnissaq sulinitsinnut pitsaanerulersitsinissatsinnut atussavarput.”
Uju Petersen ilassuteqarpoq: ”Aaqqitassat annikitsuaraannaanngillat. Iluarsartuusinissaq pisariaqarluinnarpoq, taamaaliornikkullu Maliup siunissami pitsaalluinnartuunissaa qulakkeerneqassaaq – maannalu atuisartunut kinguaarinnullu tulliuttunut nuannaarutaalluni.”
Iluarsartuussinissap sumut killinnera pillugu Kommuneqarfik Sermersooq innuttaasunut paasissutissiisassaaq. Soorlu suliarinnittussat aamma piffissap qanoq sivisutiginissaa inissinneqariarpat nalunaarutigineqarumaarluni.
