2025-mi Inatsisartunut aammalu kommuninut qinersisoqartussaavoq. Qinersisinnaatitaaneq, qinigassanngortitsinerit ullullu killiliussat pillugit uani atuarsinnaavatit.
Kommuninut qinersineq (aamma nunaqarfinnut aqutsisunut kiisalu ilagiit sinniisaannut)
Inatsisartunut qinersineq 2025
Inatsisartunut qinersineq ingerlanneqassaaq marlunngornermi 11. marts 2025.
Qinersiviit nal. 9 ammassapput aamma nal. 20 matussapput.
Inatsisartunut ilaasortat 31-t qinerneqassapput.
Qinersisinnaatitaaneq
Inatsisartunut qinersisinnaassaguit qinersinissamut pisinnaatitaallutillu qinersinermut allattorsimaffimmi allassimassaatit.
Qinersisinnaatitaavutit taamaalillutillu taasinissamut pisinnaatitaassaatit:
- Qallunaatut innuttaassuseqaruit,
- 18-inik ukioqalereersimaguit,
- qinersinissaq sioqqullugu sivikinnerpaamik qaammatini arfinilinni Kalaallit Nunaanni aalajangersimasumik najugaqarsimaguit, aamma
- Nammineersinnaassusiiagaasimassanngikkuit
Inuit, najugaqarnermik piumasaqaat imm. 3-miittumik naammassinninngitsut, immikkut ittumik qinnuteqaateqarnikkut qinersisinnaatitaaneq attatiinnarsinnaavaat. Tamanna atuuppoq inunnut, piumasaqaatit sinnerinik naammassinnittunut, Kalaallit Nunaanni ukiuni marlunni nuunnginnermi inuit allattorsimaffiannut nalunaarsimasut aammalu Kalaallit Nunaata avataani tulliuttut peqqutigalugit najugaqartut:
a) ilinniagaqarlutik Kalaallit Nunaata avataaniittut
b) Inuit nakorsap innersuussinera malillugu peqqissutsimut tunngasunik pissuteqarlutik Kalaallit Nunaata avataaniittut
c) Kalaallit Nunaanni qinigaallutik folketingimi ilaasortatut suliaqarnerminnut atatillugu Danmarkimiittut
d) Namminersorlutik Oqartussanut sinniisuullutit Kalaallit Nunaata avataaniikkuit
e) Kalaallit Nunaata avataaniittut aammalu Kalaallit Nunaannut attuumassuteqarnikkut 1-4-mi taaneqartunut sanilliunneqarsinnaasut
Katissimallutik inooqatigiittut, Kalaallit Nunaata avataaniittut makkuninnga peqquteqartut a)-e), taamatuttaaq qinersisinnaatitaapput, piumasaqaatit sinneri naammassisimagunikkit. Katissimanatik inooqatigiittut aappariillutik inooqatigiittunut sanilliunneqassapput aallannginnerminni aappariinnermut assingusumik inooqatigiilersimagunik.
Kalaallit Nunaanni aalajangersimasumik najugaqartuusimanngikkuit, kisiannili qulaani piumasaqaatit naammassisimallugit, taava taasisinnaatitaanerit attatiinnarniarlugu taasisinnaasut allattorsimaffiannut ilanngunneqarnissat qinnutigissavat. Taamatut iliorsinnaavutit immersugassap uuma immersorneratigut, taannalu uunga nassiunneratigut valg@sermersooq.gl.
Qinersisinnaatitaasut allattorsimaffiannut ilanngutsinnissamik qinnuteqaammik tunniussinissamut killigititaq tassaavoq 17. februar 2025.
Qinersiviit
Kommuneqarfik Sermersuumi qinersiviit aamma qinersinermi aqutsisunik nalunaarsuiffik uani takusinnaavat.
Nuummi qinersivik ataasinnaassaaq, tassaallunilu Nuummi illorsuaq timersortarfik (Godthåbhallen).
Allakkatigut qinersineq
Martsip qulingani nal. 15.00-ip tungaanut allakkatigut qinersisinnaavutit, Innuttaasunik Kiffartuussivimmi. (Eqqaamallugu qinersiartorninni kinaassutsimut uppernarsaammik nassassagavit)
Partiit aamma qinigassanngortittut nalunaarutiginerinut killigititaq
Partiimik nutaamik nalunaaruteqarneq
Partiit, ullormi qinersiviusumi Inatsisartuni ilaasortaatitaqanngitsut, aammalu qinersinissamut qinigassanngortitsinissamik kissaateqartut, qinersisinnaasunit atsiornernik 856-nik katersissapput qinersineq pillugu inatsimmi § 12, imm. 3 naapertorlugu.
Partiimik nalunaaruteqarneq qinersinermi ataatsimiititaliamut tunniunneqassaaq aammalu qinersisartut atsiornerinik, partiimik nalunaaruteqartunik, imaqassalluni. Uppernarsaatitut allakkami ilanngullugit nalunaarutigineqartassapput qinersisartup aqqi tamakkiisut, ulloq inunngorfia sumilu najugaqarnera aammalu qinersisartumit namminermit atsiugaallutillu ulluligaasimassallutik. Taakkua saniatigut uppernarsaatitut allakkami ilanngullugu allassimasassaaq qinersisartup Inatsisartunut qinersisinnaanermut piumasarineqartunik naammassinnissimanera pillugu inuit aqqinik nalunaarsuiffimmi pineqartumi pisortaasup uppernarsaataa atsiugaq.
Uppernarsaatitut allakkat nalunaarutiginninneq ukiumik ataatsimik sinnerluguluunniit sioqqullugu allanneqarsimasut naatsorsuutigineqarsinnaanngillat. Taamaapportaaq partii ataaseq sinnerlugu nalunaarutiginninnermi qinersisartut uppernarsaatitut allagaannut tunngatillugu.
Partiimik nutaamik nalunaarutiginninnermi immersugassaq
Kommunimut qinigassanngortittut nalunaarutigineqarnerat qinersinermut siulersuisunut tunniunneqassapput kingusinnerpaamik 11. februar 2025.
Partii sinnerlugu qinigassanngortittut
Partiit qinigassanngortitaannik nalunaarutit qinersinermi siulersuisunut tunniunneqassapput kingusinnerpaamik 18. februar 2025 nal. 12.00.
Partii ataaseq amerlanerpaamik marloriaataanik qinigassanngortitsisinnaavoq, taakku qinersinermut inatsimmi § 14, imm. 2 naapertorlugu qinerneqartussanik. Tassa imaappoq, partii ataaseq amerlanerpaamik 62-inik qinigassanngortitsisinnaavoq.
Qinigassanngortittoq ataaseq partiimut ataasiinnarmut qinigassanngortissinnaavoq, aamma qinigassanngortittoq ataaseq ataatsikkut partiimut qinigassanngortissinnaanngilaq aamma kisimiilluni qinigassanngortissinnaanngilaq.
Partiit qinigassanngortittut pillugit nalunaarutaannik immersugassaq
Partiip avataani qinigassanngortittut
Qinigassanngortittunik nalunaarutit, partiit avataanut qinigassanngortittut, qinersinermi siulersuisunut tunniunneqassapput kingusinnerpaamik 18. februar 2025 nal. 12.00. Qinigassanngortittunik nalunaarut kisimiilluni qinigassanngortittumut imaluunniit kattusseqatigiilluni qinigassanngortittunut tunngasut pisinnaapput.
Qinigassanngortittunik nalunaarut qinersisinnaatitaasunit ikinnerpaamik 40-nit atsiorneqarsimassaaq. Atsiornerit nalunaarummi namminermi issinnaapput taassumaluunniit assilineraniissinnaallutik. Aamma qinigassanngortittunut nalunaarummi paasissutissanik allassimasoqassaaq qinigassanngortittup aqqa, inuuia najugaalu.
Qinigassanngortitsisut ilaat ataaseq nalunaarut pillugu qinigassanngortitsisut tamaasa sinnerlugit saaffiginnissuteqarfigineqarsinnaasutut allassimassaq.
Partiit avataanit qinigassanngortittunut nalunaarut immersugassaq
Kommunimut qinersineq 2025
Kommuneqarfik Sermersuumi kommunimut qinersisoqassaaq ulloq 1. apriili 2025. Qinersiviit nal. 9 ammarneqassapput nal. 20 matuneqarlutik.
Kommunalbestyrelsimi ilaasortat 19-it qinerneqassapput.
Qinersisinnaatitaaneq
Kommunimut qinersisinnaassaguit qinersinissamut pisinnaatitaallutillu qinersinermut allattorsimaffimmi allassimassaatit.
Qinersisinnaatitaavutit taamaalillutillu taasinissamut pisinnaatitaassaatit:
- ullormi qinersiviusumi 18-inik ukioqalereersimaguit aamma Kommuneqarfik Sermersuumi qinersineq sioqqullugu sapaatip akunnerini 6-ini aalajangersimasumik najugaqarsimaguit aamma imaluunniit:
- danskisut innuttaassuseqarlutit aammalu qinersinissaq sioqqullugu sivikinnerpaamik qaammatini arfinilinni ataqatigiissumik Kalaallit Nunaanni aalajangersimasumik najugaqarsimaguit, imaluunniit
- sivikinnerpaamik ukiuni pingasuni naalagaaffimmi najugaqarsimasoq qinersinissarlu sioqqullugu sivikinnerpaamik qaammatini arfinilinni Kalaallit Nunaanni aalajangersimasumik najugaqarsimasoq.
Kalaallit Nunaanni aalajangersimasumik najugaqanngikkuit kommunimut qinersisinnaavutit nuunnginninni inuit allattorsimaffianni sivikinnerpaamik ukiuni 2-ni nalunaarsorneqarsimaguit aamma:
- ilinniagaqarnerit pissutigalugu Kalaallit Nunaata avataaniikkuit,
- peqqinnissamut tunngasunik pissuteqarlutit Kalaallit Nunaata avataaniikkuit,
- Kalaallit Nunaanni qinigaallutit folketingimi ilaasortatut suliaqarninnut atatillugu Danmarkimiissimaguit,
- imaluunniit Namminersorlutik Oqartussanut sinniisuullutit Kalaallit Nunaata avataaniikkuit.
Kalaallit nunaanni aalajangersimasumik najugaqartuusimanngikkuit, kisiannili qulaani piumasaqaatit naammassisimallugit, taava taasisinnaatitaanerit attatiinnarniarlugu taasisinnaasut allattorsimaffiannut ilanngunneqarnissat qinnutigissavat. Taamatut iliorsinnaavutit immersugassap uuma immersorneratigut, taannalu uunga nassiunneratigut kommuneqarfik@sermersooq.gl
Kommunemut apriilip aallaqqaataani qinigassanngortittut aqqi
Apriilip aallaqqaataani kommunemut qinigassanngortittut aqqi saqqummiunneqarput ataani takukkit.
Kommunimut qinersineq: Qinigassanngortittut
Qinersiviit
Kommuneqarfik Sermersuumi qinersiviit aamma qinersinermi aqutsisunik nalunaarsuiffik uani takusinnaavat.
Allakkatigut qinersineq
Martsip 31-ani nal. 15.00-ip tungaanut allakkatigut qinersisinnaavutit, Innuttaasunik Kiffartuussivimmi. (Eqqaamallugu qinersiartorninni kinaassutsimut uppernarsaammik nassassagavit)
Nunaqarfinnut aqutsisunut aammalu Ilagiit sinniisaannut qinersineq
Kommunimut qinersinermut atatillugu Nunaqarfinnut aqutsisunut aammalu Ilagiit sinniisaannut ulloq 1. apriili 2025 aamma qinersisoqarumaarpoq.
Nunaqarfinnut aqutsisunut qinigassanngortittunik nalunaaruteqarfik (Ulloq kingulleq nalunaaruteqarfissaq 18. marts 2025 nal. 12).
Ilagiit sinniisaannut qinigassanngortittunik nalunaaruteqarfik (Ulloq kingulleq nalunaaruteqarfissaq 4. marts 2025 nal. 12).
Nunaqarfinnut aqutsisunut qinersinermut partiinik nalunaaruteqarfik
Kommunimut qinigassanngortittut nalunaarutigineqarnerat
Kommunimut qinigassanngortittut nalunaarutigineqarnerat qinersinermut siulersuisunut tunniunneqassapput kingusinnerpaamik februaarip ulluisa 18-anni 2025 nal.12.00.
Qinersinermut inatsimmi § 14-17 naapertorlugit inuit qinersisinnaatitaasut kommunalbestyrelsimut qinigassanngortissinnaapput partii sinnerlugu, ataasiakkaatut imaluunniit kattusseqatigiinni ataasiakkaatut. Partiip avataani qinigassanngortinniaraanni qinigassanngortitsillutik atsiortut ikinnerpaamik 10-t pissarsiarineqassapput.
Kommunimut qinersinermut qinigassanngortittunik nalunaaruteqarfik