Kommuneqarfik Sermersuup Arsummi innuttaasut oqaluttuaannut, piviusulersaarusiami Det hvide guld-imi peqataasunut, ataqqinninnini takutikkusuppaa, borgmesterilu Avaaraq Olsen Arsummi nunaqarfimmi aqutsisunut innuttaasunullu qujassuteqarpoq.
Borgmesteri allakkamini Arsummi innuttaasunut qujassuteqarpoq taakku Ivittuuni orsugiassiornermut atatillugu aqqusaarsimasarpassuarminnik misigissutsiminnillu avitseqatiginninnerannut, orsugiassiortoqarneratalu kingunerisaanik misigisimasaminnik ammasumik oqaluttuarnerannut qutsaviginiarlugit.
“Arsuk pillugu oqaluttuaq Arsummuinnaq tunngassuteqanngilaq, uagulli aamma Nunatsinni ataatsimut oqaluttuarisaanitta pingaarutillit ilagaat,” Avaaraq Olsen allakkani taamatut allappoq.
Piviusulersaarusiaq Det hvide guld nuna tamakkerlugu oqallinnermik pilersitsivoq aamma Ivittuuni orsugiassiorneq pillugu oqallinnermik. Borgmesterip Avaaraq Olsenip allakkamini erseqqissarpaa Arsummiut piviusulersaarusiamut peqataanerat qanga pisimasut ullumikkumut sunniutaasa oqaluuserineqarnissaannut aalajangiisooqataasut, siunissamilu inuiaqatigiit pillugit oqallinnermut tunniusseqataasut:
“Inuiaqatigiinni inukitsunnguani, soorlu Arsuttut ittuni, unammilligassaasinnaasut siammasinnerusumik paasineqarnissaat oqaluttuarnissigut pilersipparsi, taakkualu kommunitsinni aammali Nunatsinni qanga pissutsit pillugit pingaarutilinnik ilisimasaqalersitsipput. Tamanna uagut inuiaqatigiittut isummersornissatsinnut pisimasullu ilinniutiginerisigut siunissamik pitsaanerusumik pilersitsinissatsinnut periarfissanik tunisivoq.”