Kommuneqarfik Sermersuumi Meeqqanut Atuarfeqarnermullu Ingerlatsivimmit tupanit nioqqutissat aamma tupanut taarsiunneqarsinnaasut pillugit Inatsisartut inatsisissaattut siunnersuut pillugu tusarniaanermut akissuteqarnissamut periarfissinneqarneq qujassutigineqarpoq. Inatsisissatut siunnersuutip ilusilerneqarnera sioqqullugu sinnerusukkut oqaloqatigiinnermi peqataasimanitsinnut aamma qujassuteqarusuppugut. Politiinik, Peqqinnissaqarfimmik, Kommuninit inuussutissarsiortunillu siusinnerusukkut oqaloqatigiinnermi isummat saqqummiunneqartut tusaaneqarsimaneri ersaripput.
Pujortartarnermut tunngasuni aaqqissugaanerusumik pinaveersaartitsisoqarnissaa aamma tupanik nioqqutissanik eqqussinermut tuniniaanermullu killilersuutit pisariaqartut atuutsilernissaat pillugit Inatsisissatut siunnersuummi pingaarnertut anguniarneqartut akuersaarpagut tapersersorlugillu. Meeqqanut Atuarfeqarnermullu Ingerlatsivimmit pingaartumik inerteqqutit § 2-mi allassimasut, tassunga ilanngullugu sunoorsinik, nikotinposinik E-cigaretsinillu tuniniaanissamut inerteqqut tapersersorneqarput.
Ukiuni kingullerni Kommuneqarfik Sermersuumit meeqqat inuusuttullu akornanni sunoorsinik nikotinposenillu atuinermik unammilligassat misigineqarput. 2022-mi meeqqat atuarfiini misissuineq (HBSC) naapertorlugu 7. – 8. klassini atuartut 20%-ii aamma 9. – 10. klassini atuartut 37%-ii ulluni 30-ni kingullerni sunoorsinik atuisimapput. Peqatigitillugu atuartut akornanni ulluinnarni pujortartartut ikilinngillat; 2018-imi 9. – 10. klassini atuartut 26%-ii ulluinnarni pujortartarput, 2022-mi 31%-imut qaffassimalluni.
Kommuneqarfik Sermersuumi atuarfinni, klubbini sunngiffimmilu neqeroorutini meeqqat inuusuttullu akornanni aanngajaarniutinik atuilernissamik aamma pujortartalernermik pitsaaliuinermut assigiinngitsunik suliniuteqarnikkut kisitsisit taakkua ikinnerulernissaat siunnerfilimmik sulissutigaarput. Kommunitut kommunip suliffeqarfiini sinaakkutissat, naleqartitat pissutsillu sunniuteqarfigisinnaavagut kisianni sumiiffinni allani meeqqat inuusuttullu ornittagaanni soorlu tamanit ornigarneqartartuni allani aaqqissuussaalluartumik pitsaaliuinissaq pisariaqartipparput.
Taamaattumik Meeqqanut Atuarfeqarnermullu Ingerlatsivimmit inatsisissatut siunnersuutip meeqqanut inuusuttunullu illersuisussanik aalajangersakkanik imaqarnera iluarisimaarneqarpoq. §7-imi allassimavoq meeqqat 18-it inorlugit ukiullit tupanik tuniniaassanngitsut aamma §12-imi allassimavoq tupanik nioqqutissat pisinianit takuneqarsinnaasumiissanngitsut. Inatsisissatut siunnersuummi meeqqat inuusuttullu pingaarnertut sullinniarneqartut akuersaarparput tapersersorlugulu kisianni ilisimatusarnerup takutippaa inersimasut pujortartartuttaaq inuusuttut pujortartalernerannut sunniisartut. Taamaattumik inuusuttunuinnaanngitsoq pujortartarunnaarsitsiniaaneq nalinginnaasumik ukkanneqarnissaa pingaaruteqarpoq.
Cigaretsinik tuniniaanermut tunngatillugu killilersuutit ukkanneqarnerunissaat iluaqutaasinnaavoq, matumani tupanik nioqqutissanik tuniniaanermi akuersissuteqarnissamut piumasaqaat massakkut inatsisissatut siunnersuummi ilaatinneqanngitsoq.
§20, imm. 4 sulisitsisut pujortassaarnissamik pikkorissarnissamut innersuussisarnissaannut atatillugu uparuarusupparput sulisitsisup innersuussutigisinnaasaanik Paarisap, Allorfiup peqqinnissaqarfiulluunniit iluani taamaattunik pikkorissartitsisoqarneq ajormat. Pujortassaarnissamik pikkorissaanermik ingerlatsinissamut tunngavissaqarnissaq kommunillu taamatut sulinerani tapersersorneqarnissaat pingaaruteqarluinnarpoq. Suliassaq kommuniniinnaq naammassineqarsinnaanngippat siunertamut tassunga aningaasanik nukissanillu immikkoortitsisoqartariaqaraluarpoq.
Inussiarnersumik inuulluaqqusillunga
Meeqqanut Atuarfeqarnermullu Ingerlatsivik
Kommuneqarfik Sermersooq