Nunatsinni kommunit tamarmik, Kommuneqarfik Sermersooq ilanngulluni, ataatsimoorlutik Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfimmut ernumassuteqarlutik allagaqarput. Kommunit utoqqarnut tapersersuinissaq pillugu Inatsisartut inatsisissatut siunnersuummik suliarinninnissaq isornartorsiorpaat, taanna 2024-mi novembarip ulluisa 21-anni siullermeerluni oqaluuserineqarpoq.
Piareersaatit naammaginanngitsut tusarniaanerullu ingerlanneqarnera isornartorsiutigineqarput
Kommuninit inatsisissatut siunnersuut naammattumik nassuiarneqarsimanngitsoq piareersarluagaasimanngitsorlu erseqqissaassutigineqarpoq. Pingaartumik pisariaqartinneqarluinnartunik aningaasaqarnikkut allaffissornikkullu kingunerisinnaasaannik naatsorsuutit, kommunit missingersuutaannut suliassiissutigineqartunullu inatsisitigut sunniuteqartussat, pingaaruteqarluinnartut amigaatigineqarput.
Inatsisissatut siunnersuutip tusarniaassutigineqarnera aasaanerani taamaallaat ullunik suliffiusunik 17-inik sivisussusilimmik periarfissalerlugu ingerlanneqarpoq, tamanna kommuninit naammagineqanngilaq. Naak arlalinnik tusarniaanermut akissutinik nassiussisoqaraluartoq kommuninit isornartorsiuinerit ernummatigineqartullu pimoorunneqanngitsutut isigineqarput.
Kommuninit Naalakkersuisunut inatsisissatut siunnersuutip suliarineqarnera patajaatsumik ersarissumillu tunngaveqarnissaa qulakkeerneqassasoq kaammattuutigaat. Utoqqarnut tapersersuinissaq pillugu aalajangiinissat misissueqqissaarnernik tunngavilersorluakkanik, aningaasaqarnikkut sulisutigullu atugassarititaasut sillimaffigalugit, toqqammaveqartariaqarput.