Matumuuna Sermersuumit immikkoortup ilaani 3C9-mi inuussutissarsiuteqarfik mittarfiup qanittuaniittumi sanaartorfissat atorneqanngitsut nalunaarutigineqarput. Sanaartorfissat tamarmik mittarfimmut attuumassuteqartunik inuussutissarsiutinut tunngasunut avatangiisinut klassit 1-3-miittunut atugassiissutigineqarpoq, tassanilu ilaapput quersuit, kiffartuussiviit, allaffiit, akunnittarfiit, neriniartarfiit il.il. tassunga tunngatillugu takuuk kommunimut pilersaarummut tapiliussaq 3C9-1
Kommunimut pilersaarummut tapiliussami 3C9-1 Inuussutissarsiuteqarfik mittarfiup eqqaaniittoq juuli 2024-meersoq pillugu immikkoortumi suut atuuttuunersut sukumiisumik atuarlugu paasiniarluarnissaa pingaaruteqarpoq. Kommunimut pilersaarummut tapiliussaq Sanarfinermut Avatangiisinullu Ingerlatsivik saaffigalugu pissarsiarineqarsinnaavoq, imaluunniit kommunip nittartagaani: https://kp.sermersooq.gl atuarneqarsinnaavoq.
Suut sanaartorneqarsinnaappat:
Nunaminertat mittarfimmi inuussutissarsiuteqarfinnut atugassanngortinneqarput kommunimut pilersaarummut tapiliussami immikkoortup atugassanngortinneqarnerinut pingaarnertut aalajangersakkat naapertorlugit. Nunaminertat assigiinngitsunik 2.000 m2-imiit 3.800 m2-ip akornanni annertussuseqarput. Kommunimut pilersaarummi sanaartukkap portussusissaanut portunerpaaffissanut najoqqutassat, silaannakkut angallassinermi aporfeqanngitsumik mittarfiup piumasaqataanut ataqqinnittussat allassimapput.
Nunaminertat ukua qinnuteqarfigineqarsinnaapput:
A: mittarfiup akunnittarfissaanut atugassanngortinneqartoq
D, E, F2, G, H, I & J: mittarfimmi inuussutissarsiuteqarfinnut avatangiisinut klassinut 1 – 3-nut atugassanngortinneqartut
Sanaartorfissagissaaneq
Pingaarnertut sanaartorfissagissaasoqassaaq, aammalu sanaartorfissagissaanermut 4 mio. koruunit missaannik akiliuteqartitsisoqassaaq, nunaminertap qanoq annertutiginera apeqqutaatillugu.
Nunaminertamik atugassinneqarumaartussat periusissat nalinginnaasut malissavaat, innersuussutigineqarluni agguaassinermut atatillugu kommunimi nunaminertamik atugassiisarnermut aalajangersakkat aamma sanaartorfissamik inniminniinissamut/nunaminertamik atugassinneqarnissamut tunngasumik nalunaaruteqarneq.
Kikkut qinnuteqarsinnaappat:
- Kinaluunniit inuk, suliffeqarfik, ingerlatseqatigiiffik peqatigiiffilluunniit inatsisitigut akuerisaasoq nunaminertamik qinnuteqarsinnaavoq. Eqqumaffigiuk qanigisariit arlalinnik qinnuteqarsinnaanngimmata.
- Makitsinermi qinnuteqarsinnaatitaasut tamarmik makitsinissamut ataatsimik peqartarnerat tunngaviusarpoq. Taamaalilluni aappariit, inuit inoqutigiinneersut inuilluunniit aamma/imaluunniit suliffeqarfiit qinnuteqartitsinermut atatillugu annertuumik soqutigisaqartut ataatsimik amerlanernik qinnuteqarsinnaanngillat. Aammattaaq suliffeqarfiit inuilluunniit suliffeqarfimmi tamakkiisumik ilaannakortumilluunniit piginneqataasut, suliffeqarfiup aqunneqarneranut peqataasut allatulluunniit suliffeqarfimmut aqutsisunulluunniit qanittumik attuumassutillit nunaminertamik atuinissamut uani neqeroortitsinermut ataatsimik amerlanernit qinnuteqarsinnaanngillat. Suliffeqarfinnut, suliffeqarfissuarmut attuumassutilinnut aamma tamanna atuuppoq. Assersuutigalugu aappariinnut marluusunut, imaluunniit ingerlatseqatigiiffimmut taassumalu pisortaanut, imaluunniit ingerlatseqatigiiffinnut marlunnut ataatsimik pingaarnertut aningasaliisoqartunut il.il. immikkut qinnuteqarnissaq inerteqqutaavoq.
Qinnuteqarfissaq qaangiuppat, qinnuteqaatit malittarisassanik malinnissimanersut nalilersorniarlugit misissorneqassapput. Malittarisassat malinneqarsimanngitsut paasineqarpat qinnuteqartut malittarisassanik unioqqutitsisut peerneqassapput.
Sanaartorfissatut saqqummiussani arfineq-pingasuusuni ataaseq kisimiitillugu qinnutigineqarsinnaavoq. Pingaarnersiugaq siulleq qinnuteqartumut allamut tunniunneqassappat, pineqartup sanaartorfissanik agguaanneqarnissamut kissaatigisaanik sanaartorfissani arfiniliusunik pingaarnersiuinermik allassimaffimmik qinnuteqaat imaqarsinnaavoq.
Qinnuteqaammut ilanngunneqassapput
Qinnuteqartut immersugassaq uaniittoq immersussavaat: Nunaminertamik inniminniinermut qinnuteqaat – Kommuneqarfik Sermersooq
Uku ilanngunnissai eqqumaffigikkit:
- Sanaartornissamut piviusorsiortumik piffissamik pilersaarusiorneq, nunaminertamik atuinissamut inniminniinermut nunaminertamillu atugassinneqarnermut sanaartornissamullu akuersissutitalimmik piffissaritinneqartunik atuuttunik malinnittumik.
- Nunaminertaq sorleq qinnutigineqarnersoq ilaatigullu sanaartorfissani arfiliusunik pingaarnersiuinermik allassimaffik ilanngullugu paasissutissat.
- Aningaasaliisinnaassuseqarnermik uppernarsaat: Qinnuteqartup piffissaliunneqartut atuuttut iluanni sanaartornissamut qinnuteqaammik piviusunngortitsinissamut aningaasaliisinnaassuseqarluni uppernarsassavaa. Bankimit aningaaserivimmilluunniit qinnuteqartup qinnuteqarfiata nalaani aningaasaqarnikkut pissutsit atugai pillugit piviusumik naliliinikkut naliliisimaneq tunngavigalugu nalunaaruteqarnikkut uppernarsarneqassaaq, qinnuteqartoq sumiiffimmi qinnuteqaatigineqartumi pisariaqanngitsumik kinguaattoorani sanaartornermut aningaasaliissutissanik matussutissanik pissarsinissaminut piginnaasaqartuusoq. Uppernarsaanermi qinnuteqartup ukiuni arlalinni atorunnaarsinneqarsinnaanngitsumik attartortitsisuunini pillugu aalajaatsumik attartortoqarnera imaluunniit pissutsit tassunga assingusut, apeqqutaatinneqassanngillat. Sanaartugassap aningaasalerneqarnissaanut qularnaarisumik qinnuteqartup nammineq aningaasaqarnera naapertuutissaaq.
- Qinnuteqartoq nunaminertamik atuinissamut inniminneereersimappat imaluunniit sanaartorfigineqanngitsunut nunaminertanik atuinissamut tunineqarsimappat, nunaminertamik annermik pisariaqartitsineq ersarissumik paatsuugassaanngitsumillu uppernarsaasersorneqarsimassaaq. Tamanna uppernarsaasersorneqarsinnaanngippat imaluunniit nunaminertanik siornatigut sanaartornissamut annertuumik kinguaattoorfiusoqarsimappat, qinnuteqaammik itigartitsisinnaanini ingerlatsivik pisinnaatippoq.
Qinnuteqaatit taakkuninnga paasissutissanik uppernarsaatinillu imaqartut kisimik akuerineqartussatut ilanngunneqassapput. Qinnuteqaatip tamakkiisuunissaa eqqortumillu paasissutissiinissaq qinnuteqartup akisussaaffigaa. Qinnuteqarfissatut piffissaritinneqartoq qaangiutsinnagu qinnuteqaatit kommunip misissorneq ajorpai.
Qinnuteqarnissamut piffissaliussaq
Qinnuteqaatit tamarmik 20. decembari 2024 sioqqullugu imaluunniit kingusinnerpaamik ulloq taanna nal. unnuap qeqqartinnagu tiguneqarsimasut ataatsikkut tiguneqartutut isigineqassapput. Qinnuteqaatit 20. decembari 2024 unnuap qeqqata kingornatigut tiguneqartut ilaatinneqassanngillat.
Tunniussisarnermut suleriuseq
Piumasarineqartunik naammassinnissimasut akornanni Kommuneqarfik Sermersooq makitsissaaq qinnuteqarnissamut piffissaliussap ilimagisamik sapaatit akunneri sisamat kingornagut. Sumi qaqugulu makitsisoqassanersoq pillugu qinnuteqartut nalunaarfigineqarumaarput.
Aammattaaq Kommuneqarfik Sermersuup nunaminertamik atugassiisarnermut nalinginnaasumik aalajangersagai innersuussutigineqarput. http://www.kp.sermersooq.gl
Annertunerusumik paasissutissat Sanarfinermut Avatangiisinullu Ingerlatsivimmit pissarsiarineqarsinnaapput, sai@sermersooq.gl
Nunaminertamik atuinissamut inniminniinissamut qinnuteqaat elektroniskinngorlugu uunga nassiunneqassaaq sai@sermersooq.gl ilisarnaaserlugu 3C9-imi nunaminertamut qinnuteqaat
