Ineqarnermut Avatangiisinullu Ataatsimiititap ulloq 18. oktobari 2024-mi akuersissutigivaa anartarfiit imaannik imikoorummillu igitsisarneq pillugit maleruaqqusassatut siunnersuut tamanut tusarniaassutigineqassasoq.
Maleruaqqusap massakkut Kommuneqarfik Sermersuumi anartarfilerineq pillugu maleruaqqusaq 2017-imeersoq taarsissavaa, taanna nalunaarutigineqanngisaannarpoq.
Nalinginnaasumik matumani maleruaqqusap nutarterneqarnera pineqarpoq, taamaalilluni Naalakkersuisut Malittarisassaannik, inatsisip oqaasertalersorneqarnera aamma allaffissornikkut ulloq 28. apriili 2023-meersumik najoqqutamik, malinnittunngorlugu.
Aammattaaq annikitsunik iluarsiissuteqartoqarpoq, taakkununnga ilaallutik:
- Anartarfiit imaannik errorfinniillu imikoorummik kuutsitseriaatsit suulluunniit pillugit kommune piumasaqaateqassasoq, taannalu kommunalbestyrelsimit allakkatigut akuersissutigineqassasoq.
- Inoqutigiit imaluunniit taakkununnga sanaartortoq Sanarfinermut Avatangiisinullu Ingerlatsiviup peqqusineratigut paasissutissat kommunip imikoorutip peernissaanut tunngatillugu pilersaarusiorneranut attuumassuteqartunik kiisalu imikoorutip malittarisassat atuuttut malillugit peerneqarnissaa qulakkeerumallugu tunniunneqarnissaat erseqqissarneqassasoq.
- Kommunip anartarfilerinermut atortuinik atuisut akiliuteqartassasut kommunip nalinginnaasumik ingerlatsineranut anartarfilerinermullu atortup aserfallatsaalineqarneranut aningaasartuutaanut matussutissanik.
Tusarniaanermut akissuteqaat sapinngisamik piaartumik kingusinnerpaamillu ulloq 23. decembari 2024 tiguneqassaaq.
Kommuneqarfik Sermersooq akissuteqarnissamut killiliussaq qaangiutsinnagu oqaaseqaatinik tigusaqanngippat, tamanna nassiunneqartut pillugit oqaaseqaatissaqannginnertut paasineqassaaq.
Kommunimi malittarisassat Kommunalbestyrelsimit akuersissutigineqassapput.
Saqqummiunneqarfia: 22. novembari 2024
Tusarniaanermut piffissarititaq: 23. decembari 2024
Tusarniummut akissuteqaat uunga nassiunneqassaaq: sai@sermersooq.gl