Sanarfinermut Avatangiisinullu Ingerlatsivik

Kommunimut pilersaarummut tapiliussatut Nunaannarmut pilersaarut 2-3 siunnersuut pillugu

2 months tilbage

Aninagasaqarnermut Inuussutissarsiornermullu Ataatsimiititap novembari 5-ianni 2024 aalajangerpaa, kommunimut pilersaarummut tapiliussatut siunnersuut Nunaannarmut pilersaarut 2-3 tamanut tusarniaassutigineqassasoq.

Siunertaa

Nunaannarmut pilersaarut Nuup eqqaani nunaannarmi pilersaarusiornermut piujuartitsinermik ineriartornermut qulakkeerinnissaaq, asimi kulturimik pinngortitamillu kingornussat, sukisaarsaartarfittut pingaartitat aammalu assigiinngitsunik illulianik periarfissat eqqarsaatigalugit.

Pilersaarummi siunertat tunngaviillu:

  • Nuup eqqaani nunaannarmi piujuartitsisumik ineriartornermik kiisalu tamaani assigiinngitsunik sammisassaqartitsinerit soqutigisallu pisinnaanissaannik qulakkeerinninneq.
  • Pinngortitami sumiiffiit tummarfigineqarsimanngitsut piuinnarnissaasa qulakkeerneqarnissaat, tassami naasut, uumasut kulturikkullu kingornussat, kiisalu nunatat tummarfigineqarsimanngitsut assisaqanngitsullu eqqarsaatigineqassammata.
  • Kommunimut pilersaarummik ikorfartuutaalluni, tassani nunaannarmi sumiiffiit assigiinngitsut pillugit aalajangersakkat tunngaviusut nutarterneqarlutik, immikkoortut ilaat nutaat atugassiarineqarlutik immikkoortullu ilaat pioreersunut killeqarfiit nunap nammineq isikkuanut nutaamik nunap assinganik suliaqarnikkut naleqqussarneqarlutik.
  • Nunaannarmi sanaartugassat isikkui assigiinngitsut pillugit aalajangersakkanik nutarsaaneq.
  • Siunissami takornarialerisut tammaarsimaarfiliorsinnaanerinut piffissamut killilimmut akuersissuteqarnissamut nutartikkanik malittarisassaliornissaq.
SIUNNERSUUT

Tamanut oqallisissiaq

Pilersaarutitut siunnersuut piffissami 11. novembari 2024 – 13. januarip 2025-ip tungaanut tamanut tusarniutigineqassaaq.

Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.

Oqaaseqaatit akerliliissutillu Kommuneqarfik Sermersuumi tiguneqareersimassapput januarip 13-at 2025 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl

Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.

Inatsisinuttunngasut

Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.

Pilersaarut uani atuarneqarsinnaavoq

Kommunimut pilersaarummut tapiliussamut siunnersuut kommunip nittartagaani www.sermersooq.gl-imi tusarniaassut ataani atuarneqarsinnaavoq, kommunip innuttaasunik kiffartuussiviini imaluunniit Sanarfinermut Avatangiisinullu ingerlatsivimmut 36 74 00-imut saaffiginninnikkut pissarsiarineqarsinnaavoq.