Kommuneqarfik Sermersuumi Suliffeqarnermut Isumaginninnermullu Ataatsimiititamit ulloq oktobarip 29-anni 2024-mi ataatsimiinnermini kommunip suliffeqarneq pillugu immikkoortumut pilersaarummut siunnersuut taassumalu tusarniaassutigineqarnissaa akuersissutigineqarpoq. Immikkoortumut pilersaarut kommunip Suliffeqarnermut politikkia 2023-2033-mut tapertatut isigineqassaaq.
Suliffeqarnermut Isumaginninnermullu Ingerlatsivimmi immikkoortumut pilersaarut 2023-mi upernaakkut suliaralugu aallartinneqarpoq. Suliaqarnerup ilaatut Suliffeqarnermut Isumaginninnermullu Ataatsimiititami kommunalbestyrelsimilu immikkut ittumik sammisaqartitsisoqarpoq. Taakkununnga ilanngullugit Tasiilami, Paamiuni Nuummilu innuttaasunik ataatsimiititsinerit ingerlanneqarput, taamaalillugu suliffeqarnermut suliassaqarfimmi soqutiginnittut innuttaasullu kommunimit pilersaarusiornermut isumassarsiassanik tunniussinissaminnut periarfissinneqarlutik.
Suliffeqarneq pillugu immikkoortumut pilersaarut sivikinnerusumik ukiunut sisamanut siunnerfiuvoq, aamma suliffeqarnermut politikki pillugu takorluukkanik anguniakkanillu piviusunngortitsiniarnermi alloriarnermi siulliuvoq. Immikkoortumut pilersaarut imminnut ataqatigiiaanik suliniutinik arlalinnik imaqarpoq, taakku suliffeqarnermut politikki pillugu takorluukkanik anguniakkanillu aallaaveqarput.
Suliffeqarnermut immikkoortumut pilersaarut suliniutinik qulinik ukuninnga imaqarpoq:
- Piffissami sivisuumi suliffeqanngitsunut siunnerfeqarluni ingerlatsineq
- Piffissap ilaannaani suliffiit amerlanerit
- Majoriami sulisut ilinniagaqarnerat
- Modulikkaartumik atuartitsineq
- Paamiuni Pilersitsivik
- Suliffimmik misiliinermut ilinniartuunissamullu periarfissaqarneq
- Inuussutissarsiutitut periarfissanik nutaanik tapersersuineq
- Avataanit suliartortut pillugit sulisunik siunnersuineq
- Majoriap aamma meeqqat atuarfiata suleqatigiinnerat
- Inuusuttut suliffeqannginnerannut atasumik orniguttarluni sulineq
Suliffeqarnermut immikkoortumut pilersaarut nutaaq malitsigalugu ukiuni aggersuni kommunimi suliffissarsiortunut sulilernissamullu piareersimasunut suli annertusisamik suliniuteqarnissap qulakkeernissaanut qitiutinneqassaaq. Iluminni suleqateqarnikkut, neqeroorutinik nutaanik pilersitsinikkut aamma innuttaasunut ataqatigiissaarinermik pitsaanerusumik ingerlatsinermillu anguniagaqarfiusumik pilersitsinikkut anguniarneqassapput.
Tusarniaaneq pillugu
Tusarniummi ilanngussaq 1 tassaalluni ”Suliffeqarneq pillugu immikkoortumut pilersaarut 2025 – 2029 pillugu siunnersuut”, ilanngussamilu 2-mi kommunimi suliffissaqartitsiniarnermut tunngasut, tusarniummut atatillugu ilanngussatut ilaatinneqassallutik.
Oqaaseqaatit Isumaginninnermut Suliffeqarnermullu Ingerlatsivimmut nassiunneqassapput uunga si@sermersooq.gl taassumalu assinga uunga nassiunneqassalluni Bea Mølgaard Lennart bmle@sermersooq.gl -imut aamma Kirstine Ivarsen kiiv@sermersooq.gl -imut.
Tusarniaanermut kingusinnerpaamik akissuteqarnissaq ulloq 01-12-2024.