Septembarimi Ittoqqortoormiini illoqarfimmit meeqqat inuusuttullu nuannaarutigeqisaannik qiimmaallaatigisaannillu nipilersornermik workshoppertitsisoqarpoq. Sermersuumi nipilersornermik ilinniarfiup susassaqartitsinermullu immikkoortortaqarfiup akornanni suleqatigiinnikkut suliniut ingerlanneqarpoq.
Workshoppertitsinermi meeqqat 15-it missaanniittut nipilersornermik sungiusarput, nipilersortarnerup silarsuaanit aallussillutillu tamanut nipilersornermik tusarnaartitsinissamut, septembarip ulluisa aqqarnani ingerlanneqartumut, sungiusarput. Tamatuma saniatigut meeqqerivimmi meeqqat erinarsornermik sungiusarput meeqqallu atuarfianni atuartut erinarsorlutillu nipilersorput nipilersornermut ilinniartitsisut ilagalugit.
Workshoppernermi Ittoqqortoormiini nipilersortarnernik siuarsaaneq meeqqallu nipilersorneq aqqutigalugu nutaanik misigisaqarnissaat siunertaavoq. Nipilersornermik ilinniartitsisoq Hansinnguaq Lennart oqaluttuarpoq:
“Nipilersornermut atuartitseriaatsinik assigiinngitsunik saqqummiussinissaq pingaartipparput, taamaalilluni nipilersortarnermik kulturi siunissami aamma pitsaanerulersinneqarniassammat. Meeqqat tunniusimanerat aallussinerallu uatsinnut ilinniartitsisunut assut sunniuteqarluarsimavoq. Ilikkalertupallannerat nipilersornermillu soqutigisaqarnerat nipilersornermut meeqqanullu inuusuttunut workshoppernermut peqataasunut assut neriuuteqalersitsisimavoq.”
Workshopperneq Tapiissuteqartarfik Sermermit tapiiffigineqarluni piviusunngortinneqarpoq, tapiissuteqartarfiummi kulturikkut suliniuteqartarnerup siuarsarnissaa siunertaraa. Ittoqqortoormiini Kulturimut Susassaqartitsinermullu Immikkoortortamit nipilersornermut workshoppertitsinerup illoqarfiup meerartaanut inuusuttortaanullu sunniuteqarluarsimanera assut nuannaarutigineqarpoq. “Illoqarfimmi nipilersorusussutsimik annertusaaqataavoq, taamatullu suleqateqarneq Tapiissuteqarfik Sermeq ikiorsiullugu nangikkusupparput. Nipilersornermik Ilinniarfik aamma qujassuteqarfigissavarput, tassanngaanniimmi workshoppernerup ingerlanneqarnissaanut suleqataasoqarpoq.” Charlotte Pike, Ittoqqortoormiini Kulturimut Susassaqartitsinermullu Immikkoortortami immikkoortumi aqutsisoq oqarpoq.