Kommuneqarfik Sermersooq utoqqarnut suliassaqarfimmut pilersaarummik nutaamik akuersissuteqarpoq, ukiuni sisamani aggersuni najoqqutarineqartussamik.
Suliassaqarfimmut pilersaarutikkut siunnerfigineqarpoq utoqqarnut suliassaqarfiup imminut napatissinnaasumik aamma siunissamut qulakkeerinnittumik ingerlanneqarsinnaanera, taamaalilluni kommunimi innuttaasut utoqqaat amerliartortut piareersimaffigineqaqqullugit. Suliassaqarfimmut pilersaarut qitiusumik pingaartinneqartut tallimat aallaavigalugit suliarineqarpoq: peqqissuseq, isumassuineq, teknologii, ineqarneq aamma innuttaasunik peqataatitsineq.
Kommuneqarfik Sermersuumi innuttaasut amerlassutsimikkut katitigaanerat ukiuni aggersuni malunnaatilimmik allanngussaaq, innuttaasut utoqqaat ukiuni qaangiuttuni qulini 49 %-imik amerleriarput aamma tamanna paaqqutarinninnermik neqeroorutinut piusunut tatisisitsivoq. Innuttaasut tamarmik nikagisassaanngitsumik utoqqartut inuuneqarnissaat qulakkeerniarlugu suliassaqarfimmut pilersaarutikkut neqeroorutinik ineriartortitsineq pingaartinneqarpoq, utoqqaat eqeersimaarlutit aamma sapinngisamik sivisunerpaamik namminersorlutik inuusinnaanerannut pitsanngorsaataasunik imalimmik. Suliassaqarfimmut pilersaarutikkut pingaartinneqarpoq peqqinnissaqarfimmik suleqateqarneq pitsanngorsagaq kiisalu isumaginninnermi teknologiimik annerusumik atugaqarnissaq taamaalilluni isumassuinermik suliallit suliassaannik oqilisaasoqarsinnaaqqullugu, aamma innuttaasut utoqqaat kiffaanngissuseqarnerullutik soorluttaaq ulluinnarni inuunerminni isumannaannerusumik inuuneqarsinnaaqqullugit.
Suliassaqarfimmut pilersaarutikkut suliniutit aallartinneqareersut ilagaat angerlarsimaffimmi sungiusarneq digitalimik ingerlasoq. Angerlarsimaffimmi sungiusarnermut programmikkut utoqqaat timikkut piginnaasaat nukittorsarneqassapput aamma utoqqaat namminersorsinnaanerisa attatiinnarnissaannut ikiuuttoqassaaq. Suliniut taanna misiliutitut suliniutaalluni upernaakkut 2024 aallartinneqarpoq, angerlarsimaffimmi ikiortitut neqeroorummik aaqqissuussamut aaqqissuussat digitaliusut ilanngunneqarput.
Tassunga atasumik Isumaginninnermut Suliffeqarnermullu Ataatsimiititami siulittaasoq Inge Olsvig Brandt ima oqarpoq: “Kommuneqarfik Sermersuumi utoqqaalluni eqeersimaartumik inuuneqarnissamut inuiaqatigiinnilu peqataanissamut pitsaasunik atugassaqartitaanissaq pisariaqarpoq. Uagut kommunitut akisussaaffigaarput qulakkiissallugu, utoqqaat tamarmik ataqqineqarnermik, naleqartinneqarnermik isumassorneqarnermillu misiginissaat.”
Nangilluni oqarpoq: ”Suliassaqarfimmut pilersaarutikkut anguniakkat suliniutillu erseqqissut tapersersorneqassapput, utoqqarnut suliassaqarfimmi pisariaqartitsinernik atuuttunik malittarinninnermik naleqqussarsinnaanermullu tunngasut. Pilersaarut una aqqutigalugu Kommuneqarfik Sermersuumit kissaatigineqarpoq utoqqartut ataqqinertumik toqqissisimasumillu inuuneqarnissamut sinaakkutissanik pilersitseqataanissaq – maannakkut siunissamullu.”
Utoqqarnut suliassaqarfimmut pilersaarut nutaaq annermik paasisaqarfigerusutsappiuk, taava ataani linki tooruk.
Utoqqarnut suliassaqarfimmut pilersaarut nutaaq uani atuarsinnaavat.