Atuarfiup Inussuup ammarneqarnissaa suli ullulerneqanngilaq kisianni tamanit atuarfiup piaartumik atuartoqalernissaa siunnerfigalugu sulissutigineqarpoq.
Atuarfik Inussuk aggusti 2024-mi ammartussatut pilersaarutigineqaqqaaraluarpoq kisianni sanaartukkap atorneqalernissaa ajoraluartumik piariinngimmat atuarfittaap ammarneqarnissaa suli utaqqineqarpoq. Pissutaasut pingaarnerit tassaapput ikuallattoornissamut illullu teknikkimik atortulersuutaanut atatillugu pissutsit iluarsineqanngitsut arlallit. Pissutsit taakkua atuarfiup tunniunneqannginnerani atulersinneqannginneranilu iluarsiivigineqassapput naammassineqarlutillu.
Borgmesteri Avaaraq Olsen allaffimminiit aqqusernup akia atuarfimmik sanaartugaq toqqaannartumik isikkivigivaa – taannalu ulluinnarni atuarfiup suli atulerneqarnissaata utaqqineqarneranik eqqaasitsisuusarpoq.
“Kinguaattoornerup malitsigisaanik ajornartorsiutaasinnaasut ajuusaarutigivavut. Tamanna atuartunut, angajoqqaanut atuarfimmilu sulisussanut aammali peqatigiiffinnut eqaarsaartarfinnik allanillu atuisussanut sunnerneqartunut uggornarpoq. Atuarfiup atulersinneqarnissaata utaqqinerani Atuarfik Ukaliusaq aamma Atuarfik Samuel Kleinschmidt utaqqiisaasumik atorneqarput taakkunanilu atugassaritinneqarallartut pitsanngorsaavigineqarnissaat pingaartipparput,” borgmesteri oqarpoq.
Kommunaldirektørip Ole Jakobsenip erseqqissarpaa pilersaarummik suliaqartut tamarmik atuarfiup piaarnerpaamik ammarneqarnissaa ilungersuutigalugu sapinngisartillu tamaat sulissutigigaat. Atuutilersitsinissap pisariaqanngitsumik kinguarsarneqarnissaa aamma innuttaasut pisariaqanngitsunik akornutaasunik allanik ajornartorsiortinneqarnissaat kimilluunniit anguniarneqanngilaq.
Nassuiaavoq: ”Ukiaanerani atuartut atuanngiffeqarneranni ammarneqarnissaa neriuutigigaluaqaarput ajoraluartumilli taamaattoqanngilaq. Atuarfiup inaarutaasumik akuersissutigineqannginnerani pissutsit assigiinngitsut inissinneqaqqaartariaqarput. Suliaq taanna tuaviuussinnaanngilluinnarparput.”
Naak pilersaarut kinguaattooqqagaluartoq Ole Jakobsenip atuarfiup ammarnissaanut piareernissaa qilanaaraa: “Atuarfik naammassineqaruni Kalaallit Nunaanni atuarfinni nutaajunerpaajussaaq siunissamullu piareersimanerpaajussaaq. Aqqut takivoq kisianni atuartut sulisullu tulluusimaarutigisinnaasaannik atuarfeqalerutta tamanna imminut akilersinnaakutsuussaaq.” naggasiivoq.
Piffissami matumani kinguaattoornerup qanoq sivisutiginissaa nalugallarneqarpoq kisianni teknikkikkut unammilligassat uteqqiattut aaqqiiviginiarlugit kommunimit entreprenøri qanimut suleqatigineqarpoq. Kommunimit sanaartornerup killiffianik ingerlaavartumik ilisimatitsisoqartassaaq aamma pissutsit tamarmik inissinniariarpata ammarneqarnissaanut ulluliussamik nalunaaruteqarnissaq naatsorsuutigineqassaaq.