Tasiilap 130-nngortorsiortinneqarneranut atatillugu Ammassalimmi Katersugaasivik eqqumiitsuliortoq Sacha “Cheeky” Malinský suleqatigalugu nutaamik eqqumiitsuliamik illoqarfimmiunut tunissuteqarpoq.
Aningaasaateqarfik Sermeq kiisalu Tasiilami Najukkami Ataatsimiititaliaq, STARK, RAL aamma Pilersuisoq suliniummut aningaasaliisuupput, tassuuna illoqarfiup oqaluttuarisaanera avataaniit tikittunut tikilluaqquseriaatsimi ileqquusumut ataqqinninneq ersersinniarneqarpoq .
Eqqumiitsuliaq ajasoornartoq maanna umiarsualivimmi Pilersuisup illutaata eqqaani kusassaataaqaaq, assiliartaanilu ersersinneqarluni ammassak tunumiutullu allanneqarluni “Digidduari,” isumaqartoq “Tikilluarit”. Eqqumiitsuliortup illoqarfiup taaguutigeqqaagaa Angmagssalik aallaavigalugu isumassarsiorsimavoq, eqqumiitsuliamilu inoroorsaarneq, Tasiilarmiut ilisarisimaneqaataat ersersinniarneqarluni. Sumiiffimmi naasut assingi tungujuaartunngorlugit eqqumiitsuliamut sinaakkusiunneqarsimapput, tassuuna illoqarfiup innuttai tikeraallu tikilluaqqullugit.
Sacha “Cheeky” Malinský-p eqqumiitsuliani suliarineralu ima nassuiarpaa: “Illoqarfiup oqaluttuarisaanera peqatigitillugulu Tasiilami ammasuunermik kissalaassusermillu misigisitsisarnermik ilisimaneqaataasoq eqqumiitsuliakkut ersersinneqarnissaat angorusunnikuuara.
Inuusuttut qalipaaqatigalugit aamma nukissamik nutaaliorsinnaassuseqarnermillu takutitsinerat takullugu misigisaq assissaqanngilaq. Inuusuttut tulluusimaarutissaqaqaat. Qalipaariarnerit tamarluinnarmik isumalerujussuupput, illullu isuani suliap inernera takuneqarsinnaavoq, amerlasuujulluni kivitseqatigiikkaanni angusassaq annertunerulertartoq. Tasiilap 130-nngortorsiornerani inuusuttut illoqarfimminnut tunissutaat kusanaqaaq.”
Eqqumiitsuliaq katersugaasivimmi aqutsisup Jonna Nielsen, Siu-Tsiu aamma inuusuttut ukioq manna siusinnerusukkut Belgiamut kulturi pillugu paarlaasseqatigiittoqarneranni peqataasimasut eqqumiitsuliortumut ikiuunnerisigut pilersinneqarpoq.
Katersugaasivik suleqatigisaalu tamaasa suliniummut immikkut ittumut tamatumunnga ikiuunnerannut qujavugut.
