Sapaammi kalaaleq arnaq oqaluttuarisaanermi arnani maligassiuisuusoq Arnarulunnguaq ataqqiniarlugu eqqaassuserneqarnerata uleerneqarnerani borgmesteri Avaaraq S. Olsen najuuppoq. Pisoq Nuup Saavani pivoq, eqqaassutissarlu eqqumiitsuliortumit Aka Høeghimit aamma Thomas K. Andersenimit suliaasoq maanna qaqugorsuarmut atasussanngorpoq.
Tallimassaanik Thjule-ekspeditionimi (1921-1924) Arnarulunnguaq qitiusumik inissisimalluni peqataavoq, taanna Knud Rasmussenimit siuttuuffigineqarluni aqunneqarpoq. Borgmesterip Avaaraq S. Olsenip oqalugiaatimi Arnarulunnguup sapiissusia, nukittunera ilisimasassarsiorlunilu angalanermi pingaaruteqarluni peqataanera nersorpaa. Eqqaassutissaq Arnarulunnguup suliani pillugu ataqqineqarnissaanut pisariaqartumullu takussutissatut taavaa, taanna issittumi ilisimasassarsiornermi aamma Kalaallit Nunaata oqaluttuarisaaneranut pingaaruteqarluinnartumik inissisimasimavoq.
”Eqqaassutissaq una illoqarfitta kulturikkut oqaluttuarisaanerata ilaatut kusassaataaginnanngilaq, eqqaasitsisuuvorli arnaq kalaaleq pingaarutilik pillugu,
suliani aqqutigalugit kalaallit arnat qanoq annertutigisumik angusaqarsinnaanerat pillugu,” borgmesteri oqarpoq. Aamma Arnarulunnguup ilisimasassarsiornerup iluatsinnissaata qulakkeerneqarnissaa pillugu inissisimanera erseqqissarpaa, suliarpassuani inuunermullu pingaarutilinnik piginnaasani aqqutigalugit.
Eqqaassutissaq pisortatigoortumik Kommuneqarfik Sermersuumut tunniunneqarpoq, eqqaassutissap aserfallatsaaliorneqarnissaanik isumaginnittussaq.
Peqatigiiffik Arnarulunnguaq
Peqatigiiffik Arnarulunnguaq 2008-mili Arnarulunnguup eqqaassuserneqarnissaa aamma oqaluttuarisaanermiilernissaata qulakkeerneqarnissaa siunnerfigalugu sulilluni aallartippoq. Peqatigiiffik Asii Chemnitz Narupimit siuttuuffigineqartoq pilersinneqarpoq Arnarulunnguup eqqaassuserneqarnissaa siunertaralugu, taanna 5. Thuleekspeditionimi pingaaruteqarluinnartumik inissisimavoq. Arnarulunnguaqarsimanngikkaluarpat ilisimasassarsiorneq taamatut atsigisumik iluatsissimanavianngikkaluartoq Asii Chemnitz Narupip erseqqissarpaa. Suliassat inuunermut pingaarutillit, soorlu nerisassiorneq atisallu ammit aserfallatsaalineqarnissaat Arnarulunnguup isumagisarivai, tamannalu peqataasut issittup silaata sakkortuup anigornissaanut qulakkeerinnittuuvoq.
Peqatigiiffik nuimasunik arlalinnik ilaasortaqarpoq, taakkununnga Tukummeq Qaavigaq, Karo Thomsen Fleischer, Mille Søvndahl Pedersen, Aviâja Lyberth Lennert, Jens Danielsen aamma Aqqaluk Lynge ilaapput, tamarmik Arnarulunnguup nersorneqarnissaanik, pisariaqartumik, suliaqartut.
Aka Høegh, eqqaassutissamik suliaqartuusoq, oqarpoq, suliaq tassaasoq arnamut kalaallimut tullermut Arnarulunnguatut ittumut takussutissaasoq.
