Kommuneqarfik Sermersuumi aaqqissuussaanikkut allannguineq, oktobarip aallaqqaataat 2024 atuutilertussaq ullumi saqqummiunneqarpoq. Allannguinermi sumiiffinni aqutsinerup pitsanngorsarneqarnissaa anguniagaavoq, aammalu Nuup avataani illoqarfinni, najugaqarfinnilu minnerni akisussaaffimmik annerusumik tunineqassallutik. Iliuutsit pineqartut kommunip innuttaasunut pitsaasumik kiffartuussinissaminut iliuuserai.
Siammaanermi pingaarnertut Tasiilami, Paamiunilu immikkoortuni akisussaaffeqarnerulissapput. Taakkua immikkoortoqarfimminni illoqarfinni nunaqarfinnilu ingerlatsineq akisussaaffigilissammassuk. Allannguineq suliassanik arlalinnik nassataqarpoq, ilaatigut ingerlatsinerup aserfallatsaaliinerullu iluani, taakkualu sumiiffinni aqutsisunut ingerlatinneqartussanngorlutik. Taamaaliornikkut aalajangiiniarneq sukkanerusumik pisinnaalissaaq, suliallu suliarinissaannut sumiiffimmiittut peqataatinneqalissallutik.
Saniatigut suliffeqarfimmi kiffartuussineq allattoqarfittut ingerlalissasoq aaliangiunneqarpoq, immikkoortoqarfik ingerlatsivinnut tapertaanerulissalluni. Taamaaliornikkut qanimut suleqatigiinneq pilersinneqassaaq ingerlatsiviillu ataasiakkaat pitsaanerusumik innuttaasunut sullissisinnaanissaat qulakkeerneqassalluni.
Allannguinerup malitsigisaanik suliassat amerlanerit qitiusumik aqutsisut ataannut katersuunneqassapput, assersuutigalugu aningaasaqarnerup attaveqaqatigiinnerullu iluani. Taamaaliornikkut pitsaanerusumik aqutsisoqalissaaq suliallu ingerlannerini suliat pitsaanerulissallutik. Siammaaneruttaaq kingunerissavaa nunaqarfinni aqutsinerulerneq, tassami nunaqarfinni aqutsisoqalissaaq taakkualu sumiiffinni missingersuutit ingerlatsinerlu akisussaaffeqarfiginerulissavaat.
Borgmesteri Avaaraq Olsen ima oqarpoq:
“Allannguutit ukua aallaavigalugit kommunitsinni sumiiffinni aqutsinerup pitsanngorsaaffigineqarnissaanut alloriarneq pingaarutilik alloriarfigissavarput. Innuttaasut pitsaanerpaamik kiffartuunneqarnissaat, aalajangiinerillu taakkununnga qaninnerpaanissaat kissaatigaarput. Politikkikkut suliassanik siammaaneq anguniarneqarsimavoq, nuannaarutigaaralu piviusunngortinneqalermat.”
Kommuneqarfik Sermersuup allannguineq pillugu sulisorisani 2.500-usut paasitereerpaat, atuutsitsiartuaarnissarlu ilutigalugu sulisut innuttaasullu ingerlaavartumik paasissutissiiffigineqartarumaarlutik.