Nunatsinni meeqqat atuarfii assigineqaratik Igalikumi sisamanik atuartulinnit Nuummi atuarfittaami 1.200-nik atuartulimmut assigiinngitsigaat. Taamaammat assigiinngitsutigut aaqqiissutit suleqatigiinnerillu pisariaqartuupput. Kommunit ataatsimoorlutik meeqqat atuarfiinik ineriartortitsineranni tamarmik Kivitsisami pingaartinneqarput. Hempel Fonden, A.P. Møller Fonden, Villum Fonden aamma Oak Foundation Denmark-imit tamarmik immikkut 3,75 millioner kroninik katillugillu 15 millioner kroninik aningaasaliinerini tunngavissiilluarnissaq Kivitsisallu ineriartuinnarnissaa qulakkeerneqarput.
Nunatta isorartussusaa inuttussusaalu ilinniartitaanermi aaqqiissutit digitaliusut atorlugit pitsaassutsimik kivitsinissamut periarfissaqarluarneranik isumaqarpoq. Ukioq 2018 aallarniutigalugu Kivitsisa nunatsinni meeqqat atuarfiini tamani atortulersuutit digitaliusut atorlugit aqqutissiuivoq. Maanna atuartut ilinniarsimanngitsunik ilinniartitsisullit alimasissumit atuartinneqarsinnaapput, atuarfinnilu minnerusumi atuartut ukioqatitik imaluunniit soqutigisaqaqatitik peqatigalugit suliaqarsinnaallutik. Ilinniartitsisunut tamanna isumaqarpoq nutaanik periarfissaqalernermik, atuarfiit akunnerminni suleqatigiissinnaanerannik, sulianullu tunngatillugu avitseqateqarsinnaanermik kiisalu nittartagaq aqqutigalugu piginnaanertusarsinnaanermik. Nunarujussuarmi siammasissunik najugaqarfiusumi innuttaasukitsumilu atuarfinni suliniuterpassuit allatut ataqatigiilersitsipput.
Kivitsisa suliniutitut ataatsimoorussatut aallartinneqarpoq, kommunillu tallimaasut tamarmik qanimut suleqatigiinnertik ingerlateqqinniarlugu aalajangiussimavaat. Allaffeqarfik ataatsimoorussaq pilersinneqarpoq ukiunilu pingasuni ingerlanneqartussamik kommunit peqatigiillutik tunngaveqarnerulernissamut suliniut, katillugu 15 millioner kroninik Hempel Fonden, A.P. Møller og Hustru Chastine Mc-Kinney Møllers Fond til almene Formaal, Villum Fonden aamma Oak Foundation Denmark-imit aningaasalerneqartoq, ingerlanneqalissaaq.
“Ukiut kingulliit arfinillit Kivitsisa suleqatigiillualernermut meeqqallu atuarfiisa pissanganartumik nutaamik sammiveqalernerinut sinaakkusiisuuvoq. Ataatsimoorussamik allaffeqarnermi nutaanillu aningaasaliiffigitinnikkut tunngavissinneqarluarpugut aaqqiinerit pilersitatta ineriartortiinnarnissaannut taakkulu aaqqissuussaanerup atuarfeqarnerullu iluaniitilernisaannut suliaqarsinnaalerluta. Ineriartortitsineq sivisusarpoq, nuannaarutigeqaarpullu aningaasaateqarfiit sisamaasut aallaqqaataaniillu suliniut tapersersorusummassuk tunngavissiilluaqataarusummatalu”, Kivitsisap siulersuisuini siulittaasoq, Malene Broberg oqapoq.
Tunngaveqarnerulernissamut pilersaarut ilaatigut nuna tamakkerlugu allaffeqarfimmut ilikkariartornermut siunnersorteqalernissamik ilinniartitsisullu mentorillu akornanni piginnaanertusaanissamik kiisalu atuartitsissutissanik ineriartortitsinissamik imaqarpoq. Tunngaveqarnerunernissamut pilersaarut Ilinniartitaanermut Aqutsisoqarfik aammalu Ilinniarnermut Ilisimatusarfik, suliaqarnissamut pingaaruteqartumik inissisimasussaasut, qanimut suleqatiginerini pilersinnaqarpoq.
“Inersiartortitsiniarutta ataatsimooruttariaqarparput. Taamaammat assut nuannerpoq Kivitsisap suliaqaqqinnissaa ilaatigut Ilinniartitaanermut Aqutsisoqarfik Ilinniarnermullu Ilisimatusarfiup qanimut suleqatigineqarnerani pilersinneqarmat. Suliniut nutaat aallartinnissaannut assut qilanaarpugut. Qularutiginngilluinnarparput atuartunut ilinniartitsisunullu ulluinnarnik ilikkarfiulluartunik kinguneqarumaartoq”, Malene Broberg oqarpoq.
Kivitsisa pillugu filmit nutaat
Kivitsisap nittartagaani www.kivitsisa.gl filmeqarpoq minutini qulini Kivitsisap ukiut arfinilliit kingulliit suliaanik takutitsisumik. Filmi Inuk Silis Høeghimit suliarineqarpoq.
Paasissutissat:
Meeqqat atuarfiat:
7.476 atuartut
1.027 ilinniaritsisut
24 illoqarfinni atuarfiit
49 nunaqarfinni atuarfiit
(Kisitsisit Kalaallit Nunaanni Atuarfik 2022-2023. Folkeskolen i Grønland-imeersuupput. Ilinniartitaanermut Aqutsitsoqarfik)
Kivitsisa:
⁃ Ilinniartitsinerit atuartunik suliaqartitsisuusut, alimasissumit atuartitsinerit piginnaanertusaanerilu nutaat
⁃ Atuartunut, ilinniartitsunut ilinniartitsisunngornianullu tamanut iPadit
⁃ Kommunit ataatsimoorlutik aningaasaligaannik ataatsimoorussamik allaffeqarfik
⁃ Ilinniartitaanermik Aqutsisoqarfik, Ilinniarnermut Ilisimatusarfik, Ilinniartitaanermut Kultureqarnermut, Timersornermut Ilageeqarnermullu Naalakkersuisoqarfik allarpassuillu
⁃ Katillugu 50 mio. kr.-nik Hempel Fonden, A.P. Møller Fonden, Villum Fonden aamma OAK Foundation Denmark piffissami 2018 – 2023-mi aningaasalerneqarneq.
Kivitsisap tunngaveqarnerulernissamut pilersaarutaa 2024 – 2027:
⁃ Allaffeqarfimmi nuna tamakkerlugu ilikkariartornermut siunnersorti
⁃ Piginnaanertusaaneq suliniutillu ineriartortitsisut
⁃ Atuartitsimermi atortussat
⁃ Katillugu 15 mio.-inik Hempel Fonden, A.P. Møller Fonden, Villum Fonden aamma Oak Foundation Denmark-imit aningaasalerneqarneq.