Atuarfik Inussummi atualertussat Nuummi atuarfinni allani atuarlertussat assigalugit atualernissaat siusinnerusukkut nalunaarutigineqarpoq. Atuarfik nutaami ikuallattoornermi qatserutit akuersissutigineqannginneri pissutigalugit, atuartut ASK-imi USK-imilu aallartissapput.
Ullormi 29. aggusti Atuarfik Inussuup atoqqaarfissiornissaanut pilersaarutaaqqaaraluartoq taamaatiinnarneqartariaqarpoq paarlattuanillu atuartitsineq Atuarfik Ukaliusami (USK) aamma Atuarfik Samuel Kleinschmidtimi (ASK) ingerlanneqassallutik. Klassit imatut agguataarneqarput:
• 1. – 3. kl. USK
• 4. – 7. kl. ASK
• 8. – 10. kl. USK
• Immikkut atuartinneqartut ASK. Atuartut immikkut atuartinneqartut tamarmik – 1. klassimiit 10. klassimut ASK-imiissapput.
USK-imi ASK-imilu ulloq atualerfissaq tassaavoq 15. aggusti, 1. klassit nal. 11.00 atualissapput, atuartut 2. klassiniit 10. klassinut nal. 9.00 atuariartussallutik.
Angajoqqaat paasitinneqarput, 1.-3. klasset AKO-t ornittagaat massakkutulli ingerlaannassasut, atuartullu nukarliit atuareernermi kingorna ornittakkaminnut taakanngaanniillu ingerlaqateqartassapput.
“Allannguutit malitsigisaannik akornusiinerit ajuusaarutigaavut, atuartut tamarmik pitsaasumik atualernissaat pillugu sapinngisarput tamaat sulivugut naak sinaakkutissat utaqqiisaarutaagaluartut” Uffe Lilholm, Atuarfik Inussummi pisortaq oqarpoq.