Sermersuup inissianik attartorneranut pissutaasoq

Kommuneqarfik Sermersuup namminersortunit aningaasaliisartunit inissianik attartornera innuttaasunullu attartukkanik attartortitseqqinnera maannakkut Namminersorlutik Oqartussanit sakkortuumik isornartorsiorneqarpoq.  Ukiut tallimat ingerlaneranni innuttaasut inissianik 300-t sinnerlugit amerlatigisunik taama periuseqarnikkut pissarsissutereerneqartullu Namminersorlutik Oqartussanit periuseq unitseqquneqarpoq.

Kisianni sooruna Sermersooq namminersortut inissiaataannik attartortartoq?

”Akissut ima naatsumik akineqarsinnaavoq, attartorpugut pissutigalugu inissiat amigaatigigatsigit. Kingumut eqqaamasinnaasakka malillugit Nuummi innuttaasunut inissiat amigaataajuarnikuupput, tamatumalu iliuuseqarfiginissaanut Kommunalbestyrelsimit pimoorunneqarpoq”, borgmesteri Charlotte Ludvigsen taama oqarpoq.

Takinerulaartumik ajornakusoornerulaartumullu tunngasumik akissuteqarfigissagaanni, kalaallit kommunii namminneq inissialiornissaannut inatsisitigut ajornakusoortoqarpallaarneratigut periarfissaqarpallaanngillat. Kommunit aningaasanik taarsigassarseriarlutik inissialiorsinnaanngillat pisortanilu inissianik ineqarnermut akiliut appasingaarmat innuttaasunut attartortinnerini aningaasatigut isertitaqarfigisinnaanngilaat. Ineqarnermut akiliutit taamaallaat aserfallatsaaliuinermut aningaasartuutinullu ataavartunut matussusiisarput 

”Kommunitut aningaasanik taarsigassarsiseriarluta inissialiorsinnaanngilagut. Tamanna ima isumaqarpoq, inissialiornermi aningaasat attartukkat ileqqaaruteqarnikkut katersoqqaariarlugit sulineq aatsaat aallartissinnaavarput. Taamatut suleriuseqaannarluta ingerlagutta, ukiumut inissiat 40-t tikillugit paarlaasseqatigisinnaavagut. Inuit 2000-t utaqqisut allattorsimaffianniitillugit ajornartorsiummik tamanna aaqqiisitsinavianngilaq”, Charlotte Ludvigsen oqarpoq.

Sermersuup inissianik attartorneranut pissutaasut pingajuat tassaavoq, taamatut aaqqiissuteqarneq kommunip karsianut akikinnerpaammat.  Kommunip sanaartorneq pinnagu attartorneq sipaarutigisaraa kommunip kukkunersiuisuanit Deloittemit naatsorsuisarnerit arlaleriarlugit takutittarpaa. Ilaatigut sanaartornerluttoqaratarsinnaanera imaluunniit kinguaattooratartoqarsinnaanera imaluunniit aserfallatsaaliuinissamut aningaasartuuteqaratarnissaanik soqanngitsoq tamanna pissuteqarpoq.

”Ullumikkut inissiat 300-t attartugaraavut. Ineqarnermut akiliutinut ukiumut 11 mio. koruuninik tapiisarpugut. Inissiat pineqartut sanaartorneri 1 milliardit sinnerlugit akeqarput. Tassa imaappoq, pisiarineraniit akisuninngussappata suli ukiuni 100-ni attartortussaavagut”, Charlotte Ludvigsen oqarpoq.

Inissianut tunngasumut suliap ingerlarnga tamaat uani takuuk:

Pisimasunik Tulleriissaarineq