Nuummi skateboardertarfik allilerneqarpoq

Nuup illoqarfiup immikkoortortaani Qinngutsinni skateboardertarfik atorluarneqartartoq allilerneqareerluni arfininngornermi septembarip ulluisa aqqaneq aappaanni atoqqaarfissiorneqarpoq.

Qinngutsinni skaterboardertarfik nuannarineqarluartoq rampinik marlunnik ilaneqarpoq. Nammineq kajumissutsimik suliniuteqartut Kommuneqarfik Sermersuumi Peqqinneq Susassaqartitsinermillu Immikkoortortaqarfik suleqatigiillutik skateboardertarfik allivaat. Inuusuttut Taatsi Olsen, Qulutaq Rosing Kleemann, Manu Kleemann kammalaataasalu minirampenik taaneqartartunik sanasuupput, Kommuneqarfik Sermersooq atortussanik aningaasaliisuullutik.

Suliniuteqaqataasoq Taatsi Olsen nammineerluni skateboardertarfimmik atuisuusoq, sooq alliliinissamik suliniuteqarsimanerluni ima tunngavilersuivoq.

“Uagut aamma skateboardertaratta, Qinngutsinnilu skateboardertarfimmi atuisarluta, taamaammat takusinnaasimavarput skateboardertarfik meeqqaniit inersimasunut atorluarneqartartoq. Ilaatigut ulikkaartarmat eqqarsarsimavugut ilaneqartariaqartoq.” Taatsi Olsen oqarpoq.


Kommune aningaasaliisuuvoq

Alliliinissamik isuma pilermat Taatsi Olsen kammanilu nammineerlutik internet atorlugu skateboardertarfimmik qanoq sanasoqarsinnaanersoq misissuisimapput. Misissuitillutik paasisimavaat nammineerlutik sanasinnaallutik, taamaasillutillu nammineq sananissartik siunniussimallugu.

“Takusinnaaleratsigu nammineerluta skateboardertarfimmik sanasinnaalluta Kommuneqarfik Sermersuumi Peqqinneq Susassaqartitsinermilu immikkoortortaqarfik saaffigisimavarput suleqatiserillugillu. Qujanartumillu Kommuneqarfik Sermersooq skateboardertarfik allilerneqarnissaanut atortussanik akileerusussimapput.” Taatsi Olsen unnersiorpoq.

Alliliineq aamma Kommuneqarfik Sermersuumiit nuannaarutigineqarpoq. Sungiffik pillugu siunnersorti Sequssuna Fleischer Schmidt ima tunngavilersuivoq.

“Immikkoortortaqarfitsinniit maluginiarsimavarput skateboardertarfik nuannarineqangaarluni atorluarneqartartoq. Taamaammat Taatsikkut kammanilu skateboardertarfimmik alliliiniarlutik saaffiginnissuteqarmata isumaqarsimavugut isumassarsiatsialaasoq, taamaasillutalu aningaasaleeqataalluta.” Kommuneqarfik Sermersuumi sunngiffik pillugu siunnersorti taama oqarpoq. 


Suleqatigiilluartoqarpoq

Skateboardertarfimmik alliliisoqarnerani suleqataasut tapersersuisullu arlaqarput. Kommuneqarfik Sermersuup aningaasaleeqataanerata saniatigut suliffeqarfiit arlaqartut aamma tapersersueqataapput. Unammisitsinermi pinnatassat Enoksen Aps-imiit Johannesip Cykelilerivianiillu tunissutigineqarput, minirampeliortoqarnerani sannavimmik sakkunillu Exploration Services atukkiisuuvoq kiisalu unammisitsinermi Qulutius Events aaqqissuisuulluni.

Atoqqaarfissiorneqarmat inuit 100-t missaaniittut najuussimasut Taatsi Olsen oqaluttuarpoq. Atoqqaarfissiornermi piumasunut unammisitsisoqarpoq, tassani meeqqat 15-it inorlugit ukiullik, 15-iniit 25-nut ukiullik kiisalu 25-t sinnerlugit ukiullik agguataarlugit unammisinneqarput.