Imminut toquttarnermut akiuiniarluni unnussiuaarneq pisariaqartinneqartoq

Sisamanngornermi oktobarip ulluisa 29-anni Tasiilami innuttaasut unnuissiuaaqatigiipput, tassani imminut toquttarnermut akiuiniarluni sukisaarsaqatigiittoqarluni.

Tasiilami innuttaasut ilaat Elise Uupi Kuitse, Kommuneqarfik Sermersuumi peqqinneq, sunngiffik kulturimilu sulisoq Arkalo Skifte kiisalu Tasiilami KRK-INUA suleqatigalugit unnussiuaartitsipput.

”Imminut toquttarneq tuniluuttutullusooq pisarmat misigisimavunga arlaatigut iliuseqartariaqarluta, taamaammat unnuissiuaaqatigiinnissamik aaqqissuussisimavugut. Inuunermi nakkaqqanerpaaffimmiinneq qaangerneqarsinnaasoq paasitissallugu unnummi pingaarnertut anguniarsimavarput,” Elise Uupi Kuitse oqalluttuarpoq.

Unnussiuaarneq Tasiilap katersortarfiani ingerlanneqartoq ornigarluarneqarsimasoq Elise Uupi Kuitsep aamma oqatigaa,

”Inuusuttuaqqaniit utoqqarnut peqataapput, katersortarfipput corona peqqutigalugu 60-iinnarnik isersimaffigineqarsinnaavoq, inuillu 60-it takullutik. Tamatuma takutippaa unnuisiuaarneq pisariaqartinneqartoq. Aamma unnuk nuannersumik ingerlavoq, taamaattumik unnussiuaaqatigiinnissamik aaqqissueqqissamaarluta aalajangerpugut, tamannali suli ullulerneqanngilaq,” Elise oqarpoq.

Isiginnaartitsineq, nipilersorneq oqalugiarnerillu

Unnuissiuaarneq isiginnaartitsinermik aallartinneqarpoq, tassani Tasiilami inuusuttut isiginnaartitsisartut takutitaat pikkunarsimasoq Elise Uupi Kuitse oqaluttuarpoq. Isiginnaartitsinermi inuunerup qanoq erlinnartigisinnaanera oqariartutaasoq takutinneqarpoq.

Palasi James Ignatiussen kiisalu Think Inuk-mi suliaqartoq Karoline Bianco oqalugiarlutik saqqummiipput.

”Think Inuk-mi suliaqartoq Karoline Bianco saqqummiigami oqaluttuara qanoq iliorluni eqqarsaatinik allannguisoqarsinnaanersoq, kiisalu qanoq sumullu ikiortissarsiorluni saaffiginnittoqarsinnaanersoq,” Elise oqarpoq.

Isiginnaartitsinerit oqalugiarnerillu saniatigut Tasiilami nipilersornermik ilinniarfimmi nipilersortartut aliikkusersuipput. Pilersaarutaanngitsumillu tupaallatsitsisoqarpoq, rappertartoq Kim Jakobsen nipilersugaq ”Kissaatitit sissuikkit” rapperlugu unnussiuaaqatigiinnut tunissutitut atormagu.

Unnussiuaqatigiiffiusumi katersortarfimmi nuannersunik allagartalersuisoqarsimavoq, inuuneq ajortuinnaanngitsoq inoorusunnerulersitsisullu nivinngaassorneqarsimallutik, taakkulu aallaavigalugit nuannersumik peqataasunut oqallitsitsisoqarluni.

Unnussiuaarneq naammassimmat najuuttut ingerlakaalermata inuit ataasiakkaarlugit nuannersunik isussuffigalugit oqariartuuteqarfigineqarsimasut Elise Uupi Kuitse aamma oqaluttuarpoq.