Innuttaasunut

Borgmesterip ukiortaami oqalugiaataa: Innuttaasut pitsaasumik ineriartorneq iluaqutigissavaat

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Ukiuni siuliini Kommuneqarfik Sermersuumi ingerlalluarfiusimavoq. Aningaasarissaarfiuvoq, kommunimi innuttaasut amerleriarput, suliffissaaleqisullu aatsaat taama ikitsigaat.

”Suliffissaaleqisut ikilinerisa kinguneraattaaq, Kommunalbestyrelsimi politikeriusugut siunissami innuttaasunut pisariaqartitsinerpaanut aningaasanik atuinerulersinnaanerput. Innuttaasut sulinermikkut akileraaruteqarnerisigut meeqqanut inuuniarnermikkut ajornartorsiuteqartunut, atuarfinnut, inissialiornernut aaqqiissuteqarniarlutalu suliniutigisatsinnut allanut pingaarutilinnut aallartissimasatsinnut akissaqarnerulerpugut”, Borgmesteri Charlotte Ludvigseni oqarpoq.

Suliffissaaleqisut ikittuaraanerisa aamma ajoraluartumik kinguneraat  atorfinnik inuttassaaleqineq, tamanna pillugu borgmesterip erseqqissarpaa, eqqaamasassagatsigu suliassaqarfimminni ullut tamarluinnaasa ilungersorlutik sulisut qujamasuutigisarnissaat.

”Utoqqartatsinnik paaqqutarinnittussanik amigaateqarpugut aamma sanaartortuni sulisussaaleqivugut. Nassuerutigisariaqarparput, ajornartorsiut kommunip kisimiilluni aaqqinniarsinnaanngikkaa, pisariaqarporlu meerartavut utoqqartavullu paarsisussaqartissagutsigit aamma sanaartortussaqassappat inuiaqatigiittut aamma akisussaaqataanissaq. Taamaammat tamatta pisariaqartinneqarpugut aamma suliffik sunaluunniit atorfigineqarpat, qujanaq kivitseqataagavit!”

Ilaqutareeqarpoq suli ilungersunartorsiortunik eqqortumillu ikiorneqarnissaat pillugu anguniagaqartumik sulinissaq aallutiinnarnissaa pingaaruteqarpoq, taamaalilluni pitsaasumik ineriartorneq kikkunnit tamanit iluaqutaasinnaaqqullugu. Kommune, inuussutissarsiortut, inuiaat arlaannaataluunniit kisimiillutik aaqqissinnaanngilaat, inuiaqatigiit tamarmik sassartariaqarput.