Innuttaasunut

Tasiilami meeqqat inuusuttullu pinnersaasiussasut

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kommuneqarfik Sermersooq aamma UNICEF Tasiilami meeqqanut inuusuttunullu pinnersaasiornermik workshoppertitsissapput.

Pinnersaasiornermik workshoppertitsinerup meeqqat inuusuttullu qasuersaartissavai aasaaneranilu atuanngiffimmi atuarfiup matoqqanerani sammisassaqartillugit. Tassani pinngortitsisinnaanermik piginnaasatik atussavaat aamma inuunermi ingerlaqqinnerminni atorsinnaasaminnik ilinniassapput.

”Pinnersaasiortilluni, assaat sulineranni timi eqqissisarpoq, nuannersumillu ataatsimoortitsisarluni. Pinnersaat pilluarnermik nassataqartarpoq aamma nuannersumik eqqaassutissaalluni, ullormi taartumi atussallugu iluartoq. Workshoppimi inuusuttut namminneq isumartik malillugu pinnersaasiussapput, taamaalilluni immikkut ittumik isumaqalissaaq”, kuultinik saffiortoq Nicolai Appel oqarpoq.

Eqqumiitsuliortoq Buuti Pedersen peqatigalugu workshoppimi ilinniartitsissaaq, Nicolai Appelsillu ilinniartua, Nadja Arnaaraq Kreutzmann peqataassaaq, taassuma ilaatigut pinnersaasiat ”Panikpanik” ilusilersorsimavai, pinnersaatillu inuit kakiortariaasiannit isumassarsivigineqarsimapput.

”Neriuppunga, inuusuttut pissanganartumik sapaatip-akunnera atorumaaraat, inuussutissarsiullu Kalaallit Nunaannut siunissami annertuumik ilippanaatilik misilillugu”, oqarpoq Buuti Pedersen.

Workshoppi inuusuttut illuanni Tasiilami piffissami 1. juuli – 5. juuli 2019-imi ingerlanneqassaaq.