Nunarsuaq paasisaqarfigiuk

Multi-Kulti-mi Nunatta Atuagaateqarfianukarsinnaavutit inunnillu nunanit allaneersunik naapitsillutit imaluunniit nunarsuarmi angalasimasunit oqaluttuartunik tusarnaariarlutit.

USA-mi najugaqarneq qanoq ittuunersoq paaserusuppiuk? Imaluunniit Finlandimi? Maannakkut inunnik USA-meersunik, Canadameersunik nunanillu allaneersunik soqutiginartorpassuarneersunik inunnik maanna Nuummi ilinniartunik oqaloqatiginninnissannut periarfissaqarputit.

Aamma kalaallit namminneq ilinniarlutik sulillutilluunniit nunarsuarmi angalasimasut naapissinnaavatit.

Ukioq ataaseq nunami allamiinneq

Angunnguaq Sethsen AFS aqqutigalugu 2017/2018-imi Japanimiippoq. ”Kisimiillunga angalaninnit ilikkagaqangaatsiarpunga, japanimiut kulturiannik namminerlumi kulturinnik”, oqaluttuarpoq. Assigiinngitsorpassuarnik ilikkagaqarsimalluni oqaluttuarpoq, assersuutigalugu Japanimi isersimmatit marluk atorneqartartut - ataatsit illup iluani atorneqartartut ataatsillu taamaallaat perusuersartarfiliarnermut atortakkat. Ukioq ataaseq Japanimiinnissani toqqarsimagamiuk nuannaarutigaa, neriupporlu inuusuttut amerlanerit ukioq ataaseq nunami allamiinnissaminnut sapiiserumaartut.

”Ukioq ataaseq Japanimiinninnit assut ilikkagaqarpunga. Tatitunerulerpunga assigiinngitsunillu ileqqunik naleqartitanillu ilikkagaqarpunga, taamaalillunga arlaannik toqqaanissannut pikkorinnerulerpunga. Ukiup ataatsip ingerlanerani misigisakka ilikkakkakkalu inuunerma sinnerani pigiuassavakka”, oqarpoq.

AFS-ernerup nalaani angajoqqaarsiaqartoqartarpoq, ukiorlu ataaseq atuartoqartarluni. ”Immikkuullarissumik ataatsimoortunut ilannguttoqartarpoq. Ikinngutiginerpaasakka Japanimi najugaqarput, oqaaserlu ”angerlarsimaffik” aalajangersimasuujunnaarpoq, tassami nammineq Japanimi ilaqutartaarnikuuvunga” oqarpoq. Angunnguup oqaluttuaraa Japanimi misigisani tamarmik, ajortut ajunngitsullu, perorsaatigisimallugit, kikkullu tamarmik angalanissaminnut soqutiginnittut AFS-ernissaat kajumissaarutigalugu.

”Taamatut misilittagassarsiorluni angalaneq inuunermi misigisassaavoq, isumaqarluinnarpungalu allat nunarsuarmut misigisassarsiortariaqartut” oqarpoq.

Illit aamma misileerusuppit?

Immaqa aamma illit nunarsuarmut misigisassarsiorusupputit? Tassami AFS Nordjobb-ilu aqqutigalugu nunarsuarmut misigisassarsiortoqarsinnaavoq. Matumani AFS Nordjobb-ilu aqqutigalugu nunarsuarmut misigisassarsiornissamut periarfissat pillugit NAPA oqaloqatigisinnaavat. Tassani Angunnguaq allallu AFS-erlutik angalasimasut oqaloqatigisinnaavatit, apeqqutissaqaraanni aperineqarsinnaapput, angalanertillu oqaluttuaralugu.

NAPA aamma nunarsuup assinganik nivinngaavoq, tassanilu suminngaaneernersutit nalunaaqutsersinnaavat.

Multi-Kulti pillugu paasissutissat una toorlugu atuarneqarsinnaapput