Asii: Ineriartorneq kingaappallaarpoq

Kommuneqarfik Sermersuumi borgmesterip ukiortaami oqalugiaatimini nuna tamakkerlugu politikerit sukannersumik oqaaseqaateqarfigai.

Namminersornerup ukiunik qulinngortorsiornissaa namminersornerunerullu ukiunik 40-nik ukioq manna nalliussineqarnissaat sioqqullugu, Kommuneqarfik Sermersuumi borgmesterip ukioq manna ukiortaami oqalugiaatimini nunap ineriartornera qitiutillugu sammivaa.

”Nalliuttorsiutigisarput – nunaanani – inuusimagaluarpat apeqqusernagu naatsorsuutigissagaluarparput inuk - 40-liisoq – assuarnanngitsumik aalajangiisinnaassuseqartuussasoq, akiligassani nammineq akilertassagai, qanigisaminullu paaqqutarinnilluartuussasoq, ulluinnarnilu inuunermini imminut akisussaaffeqarluni inuussasoq”, Asii Chemnitz-Narup oqalugiaatimini allappoq.

Nuna ukiuni kingullerni qulini naammatsumik ineriartorsimanngitsoq isumaqarluni borgmesterip naqissuserpaa, taamaammallu Naalakkersuisuni Inatsisartunilu politikerit imatut qinnuigai:

” Patajaatsumik siuariartornissaq Nunatsinni tamarmi pisariaqarpoq. Politikikkut sulineq siuariartortitsisussaq, innuttaasunut inuiaqatigiiusunullu iluaqutaasussaq – ileqquliuteqqittariaqarparput.

Siuariartorneq, tamanut malunniuteqartoq!

Kalaallit Nunarput salliutikkissi tatigeqqilertariaqarparput, Nunatsinni atukkat pitsaasooqqullugit sulisusi – inuttut qaffassarluni qaqerusunnerinnarmit, perruumaataaginnarnermit partiillu soqutigisaannit uungaannaq killittartunit – tamakkuninnga tamanit Nunarput salliutinnerugissi. ”, Sermersuumi borgmesteri oqarpoq.

Oqalugiaat aajuk